जनकपुरधामय् थौं सीता जयन्ती (जानकी नवमी) हंगु दु ।
रामायणय् न्ह्यथनातःम्ह आदर्श नारी सीता थौंया न्हि बूगु धार्मिक मान्यताकथं दँय्दसं बछलाथ्व नवमियात जानकी नवमी सीता जयन्तीकथं हनेगु यानावयाच्वंगु दु ।
सीता जयन्तीया लसताय् थौं सुथंनिसें जानकी मन्दिर, राम मन्दिर व जनक मन्दिर लिसेंया देगलय् पूजाआजा याइपिं श्रद्धालुपिं मुंगु खः ।
जानकी मन्दिर व्यवस्थापन पक्षं सीता जयन्तीया लसताय् थीथी ज्याझ्वः ग्वसाः ग्वःगु दु ।
सुथय् दुधमतीइ स्नान, बधाइगान, प्राकट्य उत्सव, सनिलय् जानकी डोला यात्रा, बहनी तिल्कोत्सव व पुनः बधाई गानया ज्याझ्वः दुगु जानकी मन्दिरया सहमहन्थ रामरोशन दासं सञ्चारमाध्यमयात कंगु दु ।
सीता जयन्तीइ ब्वति कायेत नेपाल व भारतया थीथी थासं भक्तजन व पर्यटकपिं जनकपुर थ्यंगु दु ।
