२५६७ क्वःगु बुद्ध जयन्तीया लसताय् महिला बौद्ध समूहया ग्वसालय् थौं येँया ओन्दे त्वालय् बुद्ध पूजालिसें शोभा यात्रा न्ह्याकूगु दु ।
येँ मनपाया उपप्रमुख सुनिता डंगोलया मूपाहाँसुइ जूगु औपचारिक ज्याझ्वलय् नुगःखँ तयादिसें उपप्रमुख डंगोलं बुद्धया शिक्षायात जीवनय् आत्मसाथ यानाः न्ह्यज्याय् फुसा जीवन अःपुक न्ह्याके फइगु बिचाः प्वंकादिल ।
थुकथं हे येँ मनपा १२ वडाया नायः बालकृष्ण महर्जनं महिला बौद्ध समूहपाखें येँ १२ वडाय् बौद्ध शिक्षायात न्यंकेत तिबः बियावयाच्वंगु बिचाः प्वंकादिल ।
महिला बौद्ध समूहया नायः श्रीमिला सुवालया सभापतित्वय् न्ह्याःगु ज्याझ्वलय् छ्याञ्जे होलिका श्रेष्ठं लसकुस यानादीगु खःसा न्वकु गंगादेवी डंगोलं सुभाय् देछासें सभा क्वचायेकादीगु खः ।
ज्याझ्वलय् ज्यापु संस्कृति विकास कोषया नायः मंगलकृष्ण सिंह, नारायण परिवार क्लबया नायः प्रचण्डमान बज्राचार्य, ओन्दे त्वाःया नायः पूर्णमान महर्जन, गुरु बेखानारायण महर्जन, न्हय्मून्हय्त्वाः मिसा पुचःया नायः अनिता डंगोल, नेपाल राष्ट्रिय मा.वि.या प्रधानाध्यापकलिसें समूहया सल्लाहकार निर्मला शाक्यपिनि ब्वति दुगु खः ।
समूहया छ्याञ्जे सुनिता महर्जनं न्ह्याकूगु ज्याझ्वः न्ह्यः बुद्धवारीं न्ह्याःगु शोभायात्रा ह्यूमत, न्हूघः, मजिपाः, पद्मसुगन्ध विहार, यंगाः, लगं, ब्रम्हत्वाः, ओन्दे जुयाः बुद्धवारीइ हे थ्यंकाः क्वचाःगु खः ।
थौंया हे ज्याझ्वलं समूहया थीथी ज्याझ्वः न्ह्याकेगु निंतिं अक्षयकोष स्वनेज्या जूगु दु । अक्षयकोषया निंतिं निर्मला शाक्यं छगू लख, नायः सुवालं ५० द्वः, उपाध्यक्ष गंगादेवी डंगोलं ५ द्वः, श्रद्धाचारी गुरुमामं ५ द्वः तका लःल्हाःगु खः ।
ज्याझ्वलय् सुमेध भन्तें बुद्ध पूजा याकाबिज्याःगु खः ।
