सरकारं माःगु ध्यबा निकासा मबिसेंलि अनुमति काःगु १८१ आधारभूत अस्पताल दय्केगु ज्या दिउगु दु । ९६ गू अस्पताल दयेकेत अर्थ मन्त्रालयं बजेट निकासा याःगु ५ ला बी धुंकूसां नं भुक्तानी जूगु मदुनि ।
२ ला न्ह्यः ८५ गू अस्पताल दयेकेत स्वास्थ्य मन्त्रालयं थप रकम माग याःगु खः । तर अर्थं फाइल सदर याःगु मदुनि ।
मन्त्रालयया नीति तथा योजना अनुगमन शाखाया प्रमुख डा. कृष्ण पौडेलया कथं बजेटया हे हुनिं अप्वः थें आधारभूत अस्पताल दयेकेगु ज्या प्रभावित जूगु दु । ‘अधिकांश स्थानीय तगिमं डीपीआर सिधय्काः अस्पताल दयेकेत ध्यबा फ्वनाच्वंगु दु । तर अर्थपाखें ध्यबा भुक्तानी मजूगुलिं यक्व अस्पताल अलपत्र जूगु दु,’ डा. पौडेलं धयादीगु दु, ‘ज्याया प्रक्रिया थ्व हे गतिं न्ह्यज्यात धाःसा अस्पताल भवन दयेकेत दंदँ बीगु खनेदु ।’
सरकारं आर्थिक दँ २०७७÷७८ या नीति तथा कार्यक्रमय् भूगोल व जनसंख्याया लिधंसाय् हरेक स्थानीय तगिमय् ५, १० व १५ शैयाया आधारभूत अस्पताल स्वनेगु नीति काःगु खः । अस्पताल मदगु स्थानीय तगिमय् कथहं भवन दयेका वनेगु योजनाकथं स्वास्थ्य मन्त्रालयं निगू चरणय् यानाः ६५५ गू आधारभूत अस्पताल दयेकेत स्थानीय तगिंयात स्वीकृति ब्यूगु दु ।
२०७७ मंसिर १७ य् तत्कालीन प्रधानमन्त्री केपी शर्मा ओलीं छक्वलं ३९६ आधारभूत अस्पतालया शिलान्यास (जग स्वनेज्या) याःगु खः । तर जग स्वनेज्या जूगु स्वदँ थ्यने त्यंगु इलय् तकं गुलिखे अस्पतालया प्रारम्भिक रिपोर्ट तकं दयेके फुगु मदुनि । स्वास्थ्य मन्त्रालय अन्तर्गतया आधारभूत अस्पताल इकाइया तथ्यांककथं १२४ अस्पतालया प्रारम्भिक रिपोर्ट तयार मजूनि ।
आधारभूत अस्पताल दयेकेत सम्बन्धित कार्यपालिकाया निर्णय, जिल्ला समन्वय समितिया सिफारिस माः । थथे हे ५ शय्याया निंतिं ५.६ पी व १० व १५ शय्याया निंतिं ७.२ पी जग्गा अनिवार्य दयेमाः। अस्पताल दयेकेत डीपीआर तयार यानाः मन्त्रालयय् न्ह्यब्वःगु प्रारम्भिक रिपोर्ट मन्त्रालयं स्वीकृत याये धुंकाः जक बजेट निकासा जुइ ।
गुलिखे अस्पताल दयेकेगु ज्या भूमि सम्बन्धी विवादया हुनिं हे न्ह्यज्याये फयाच्वंगु मदु ।