गण्डकी प्रदेशया मुख्यमन्त्रीइ कांग्रेस संसदीय दलया नेता सुरेन्द्रराज पाण्डे नियुक्त जुयादीगु दु ।
प्रदेश प्रमुख पृथ्वीमान गुरुङं संविधानको धारा १६८ या उपधारा २ कथं २ वा २ स्वयां अप्वः दलया समर्थनय् बहुमत खाकूम्ह प्रदेश सभा दुजःया हैसियतय् पाण्डेयात मुख्यमन्त्री नियुक्त याःगु खः । पाण्डे मुख्यमन्त्री नियुक्त जुइवं कन्हय् सपथ ग्रहण याइगु जूगु दु ।
प्रदेश प्रमुख गुरुङं १२ गते स्वन्हुया ई बियाः संविधानया धारा १६८ या उपधारा २ कथं सरकार स्वनेत आह्वान याःगु खः । थुगु आह्वानकथं गण्डकी प्रदेशया मुख्यमन्त्रीइ कांग्रेस संसदीय दलया नेता सुरेन्द्रराज पाण्डेयात नियुक्त यायेत सत्तारुढ दलं प्रदेश प्रमुख पृथ्वीमान गुरुङया न्ह्यःने दाबी पेश याःगु खः ।
पाण्डेयात मुख्यमन्त्री दयेकेगु निंतिं कांग्रेस, माओवादी व एकीकृत समाजवादीया प्रदेशसभा सदस्यपिसं ल्हाःचिं तयाः सुरेन्द्रराज पाण्डेयात मुख्यमन्त्री नियुक्त यायेत दावी न्ह्यब्वःगु खः ।
कांग्रेसया २७, माओवादीया ७ व एकीकृत समाजवादीपाखें राजीव गुरुङया ल्हाःचिंलिसें पाण्डेयात मुख्यमन्त्री नियुक्त यायेत दाबी याःगु खः ।
केन्द्रय् सत्ता समीकरण हिलेवं नेकपा माओवादीया भौतिक पूर्वाधार मन्त्री हरिबहादुर चुमान व पर्यटन मन्त्री रेशम जुग्जालीं राजीनामा बियाः चैत १० गते समर्थन लित कायेवं एमालेया खगराज अधिकारी नेतृत्वया सरकार अल्पमतय् लाःगु खः । अधिकारीं वैशाख ९ गते विश्वासया मत तंकूगु खः ।
उपधारा ३ कथं दकले तःधंगु दलया हैसियतय् मुख्यमन्त्री नियुक्त यायेगु कि उपधारा २ कथं हे बहुमतया सरकार स्वनेत इनाप यायेगु धइगु अन्योल दुगु खः ।
कानुनी परामर्शलिपा सरकार क्वःदःगु स्वन्हुलिपा जक प्रदेश प्रमुख गुरुङं उपधारा २ कथं हे बहुमतया सरकार स्वनेत आह्वान याःगु खः ।
