लोकसाहित्य परिषद्या संस्थापक नायःलिसें लोकसाहित्यविद् वाङमय शताब्दीपुरुष डा. सत्यमोहन जोशीया १०४ दँ बुदिंया लसताय् छवाःयंकं थीथी ज्याझ्वः याइगु जूगु दु ।
डा. जोशीया लुमन्तिइ छवाःयंकं जुइगु ज्याझ्वःया न्हापांगु ज्याझ्वःकथं बैशाख २४ गते शनिवाः यलया मंगलबजारय् हिदान ज्याझ्वः याइगु जूगु दु ।
ज्याझ्वः ग्वसाःखलःया दुजः शान्तराज शाक्यं न्हाय्कंयात कनादीकथं नामसंगिती पाठ व प्रवचन, टेलिस्कोपं (तारा दर्शन) ज्याझ्वः याइगुलिसें सत्यमोहन जोशीजुं च्वयादीगु ‘चखुंचां हाःगु म्ये’या पुनः प्रकाशन याइगु व साहित्यकार मिना बज्राचार्यया मचा साहित्य मुना सफू नं पिथनीगु जूगु दु ।
सत्यमोहन जोशीया बुदिं बैशाख ३० गते दीप प्रज्ज्वलनया लिसें म्ह्याय् काब्येरी जोशी व परिवारपाखें मां व अबुया छुं छुं लुमन्ति न्ह्यब्वइगु ज्याझ्वः दुगु जानकारी वःगु दु ।
