भारतया नयाँ दिल्लीइ च्वंगु अल इण्डिया इन्स्टिच्युट अफ मेडिकल साइन्सेस (एम्स) य् वासः याकाच्वनादीम्ह राष्ट्रपति रामचन्द्र पौडेलया उसाँय् बांलाना वयाच्वंगु राष्ट्रपतिया ज्याकुथिं धाःगु दु । वय्कःया छुं छुं परीक्षणया रिपोर्ट अझं वये ल्यं दनिगु चिकित्सकपिनि धापु दु ।
छातीइ इन्फेक्सनया हुनिं त्रिभुवन विश्वविद्यालय शिक्षण अस्पताल, महाराजगञ्जय् भर्ना जुयाः लगातार एन्टिबायोटिक छ्यःसां प्रभावकारी मजुसेंलि चिकित्सकपिनि सुझावकथं वय्कः वंगु ६ गते भारतीय सरकारी अस्पताल एम्सय् वासः याकेत झाःगु खः ।
राष्ट्रपतिया नेपालय् हे वासः याकेगु मनंतुना दुसां चिकित्सकपिनि पुचः व प्रधानमन्त्री लिसें उच्च राजनीतिक नेतृत्वया विषेश इनापय् वय्कः भारतय् वासः याकेत झाःगु खः ।
नेपाल सरकारया निर्णयकथं उपचार पद्दति कानून, नियम व निश्चित विधिकथं जुइगु स्पष्ट जुइकजुइकं राष्ट्रपति संस्थायात हे विवादय् लाकेगु मनसायं छुं संचार माध्यम व सामाजिक सञ्जालय् पिहाँवःगु भ्रामक सूचना व दुष्प्रचारय् थःपिनि गम्भिर ध्यानाकर्षण जूगु राष्ट्रपतिया सचिवालयं थौं छगू प्रेस विज्ञप्ति पितबिसें धाःगु दु ।
राष्ट्रपति लिसें उपराष्ट्रपतिया पारिश्रमिक व सुविधासम्बन्धी ऐन, २०७४ य् विदेश भ्रमण व वासःया निंतिं विदेश वनेगु विषययात अलग–अलग व्यवस्था यानातःगु प्रष्ट दु । तर, ऐन कानून हे मथू थें यानाः सम्माननीय राष्ट्रपतिया छेँजःपिसं दैनिक भ्रमण भत्ता काय् दइगु थुज्वःगु आम नागरिकपिन्त दिग्भ्रमित याइगु सुचं सम्प्रेषण जुयाच्वंगु धासें सचिवालयं दुःख प्वंकूगु दु ।
राष्ट्रपतिया स्वकीय सचिव किरण पोखरेलं पितब्यूगु विज्ञप्तिइ थुज्वःगु भ्रामक सूचना व दुष्प्रचारया लिउलिउ आम नेपाःमिपिं मवनीगुली विश्वास प्वंकातःगु दु ।
