प्रतिनिधि सभाया बैशाख १० गते क्वचाःगु उपनिर्वाचनय् बारा–२ स उपेन्द्र यादव, तनहुँ – १ य् स्वर्णिम वाग्ले व चितवन २ स रवि लामिछाने निर्वाचित जूगु दु ।
मंसिर ४ गते जूगु निर्वाचनय् तनहुँ १ पाखें प्रतिनिधि सभाय् निर्वाचित जुयादीम्ह रामचन्द्र पौडेल राष्ट्रपतिइ निर्वाचित जुयादीगु व बारा – २ पाखें निर्वाचित रामसहाय प्रसाद यादव उपराष्ट्रपति निर्वाचित जूगुलिसें चितवन–२ पाखें निर्वाचित रवि लामिछानेया नागरिकता कायम मदुगुलिं पद खालि जुइवं उपनिर्वाचन जूगु खः ।
१० गते क्वचाःगु निर्वाचन मध्ये तनहुँ १ य् नेपाली काँग्रेसपाखें उम्मेदवारी बियादीम्ह गोविन्द भट्टराईयात १४ द्वः ७९७ मतं लिउने लाकाः राष्ट्रिय स्वतन्त्र पार्टीपाखें उम्मेदवारी बियादीम्ह स्वर्णिम वाग्ले त्याःगु खः । वय्कलं ३४ द्वः ९१९ मत हःगु खः ।
अथेहे बारा – २ या उपनिर्वाचनय् जसपापाखें उम्मेदवारी बियादीम्ह उपेन्द्र यादवंं २८ द्वः ४१५ मत हयाः निर्वाचित जुयादीगु दु । वय्कःया निकटतम प्रतिद्वन्द्वी जनमत पार्टीया शिवचन्द्र प्रसाद कुशवाहां २३ द्वः ३३४ मत हःगु खः ।
नागरिकताया हुनिं पदमुक्त जूम्ह रवि लामिछानें दकले अप्वः मतान्तरं पुनःनिर्वाचित जूगु दु । चितवन–२ या उपनिर्वाचनय् लामिछानें ५४ द्व १७६ मत हःगु खःसा वय्कःया निकटतम प्रतिद्वन्द्वी नेपाली काँग्रेसया जीतनारायण श्रेष्ठं ११ द्वः २१४ मत हःगु खः ।