उपराष्ट्रपति रामसहायप्रसाद यादवं देय्या हिउपाः, लोकतान्त्रिक संघर्षलिसें जनतां याइगु हरेक आन्दोलनय् सञ्चार ख्यःया महत्वपूर्ण भूमिका दुगु खँ कनादिसें सञ्चार ख्यः पूर्ण समावेशी जुइमाःगु खँय् बः बियादीगु दु ।
नेवाः पत्रकार राष्ट्रिय दबूया प्रतिनिधिपिनिलिेसे थौं लैनचौरय् च्वंगु उपराष्ट्रपतिया ज्याकुथिइ नाप लायेगु झ्वलय् वय्कलं उगु खँय् बः बियादीगु खः ।
राष्ट्रपति यादवं सामाजिक न्याय, लोकतन्त्र व हिउपाया निंतिं सञ्चार ख्यःया भूमिकाया सराहना यासें सञ्चार ख्यः समावेशी जूसा उकिं अप्वः स्वयां अप्वः जनताया सः पित हये फइगु बिचाः प्वंकादिल । नेपाःया थीथी भाय्, संस्कृति व संस्कार राष्ट्रिय एकताया भाव अप्वयेकगु महत्वपूर्ण माध्यम जूगु न्ह्यथसें थुकिया संरक्षणया निंतिं पत्रकारितापाखें योगदान बिइमाःगु नं वय्कःया धापु दुगु खः ।
उपराष्ट्रपति यादवं नेपाली सञ्चार ख्यःया समावेशी व मातृभाषाया पत्रकारिताया विकासया निंतिं उपयुक्र्त नीति अवलम्बन यायेत नं थम्हं ध्यानाकर्षण याकेगु धयादिल ।
उगु झ्वलय् पत्रकार राष्ट्रिय दबूपाखें नायः नृपेन्द्रलाल श्रेष्ठं उपराष्ट्रपति यादवयात भिंतुनालिसे हनापौ लःल्हानादिल ।
ज्याझ्वलय् वरिष्ठ न्वकु सुनील महर्जनं समावेशी सञ्चारया सम्बन्धय् राज्यं नालेमाःगु नीति, ज्याझ्वः बारे ध्यानाकर्षण पौ उपराष्ट्रपति यादव यात लःल्हानादिल ।
उगु झ्वलय् दबूया महासचिव कृष्णकाजी (के.के) मानन्धर, सचिव राजु नापित, सहसचिव सुनिता महर्जनपिसं प्रेस स्वतन्त्रताया उच्चत्तम अभ्यासया निंतिं समावेशी व मातृभाषाया पत्रकारिताया विकास याय्माःगु खँय् केन्द्रीत जुयाः थःथःगु बिचाः तयादीगु खः ।
उपराष्ट्रपतियात भिंतुना देछायेगु झ्वलय् दबूया येँ जिल्लाया नायः अर्विन्द्रमान सिंह, यल जिल्ला छ्याञ्जे पूर्णिमा डंगोल, ख्वप जिल्लाया नायः रामगोपाल तमखुलिसें दबूया केन्द्रीय समितिया पदाधिकारीपिनि ब्वति दुगु खः ।