वल्र्ड नेवाः अर्गनाइजेसन नेपाल च्याप्टरं येँया वसन्तपुलिइ छगू समारोह यासें नेपालय् खुक्वःगु हलिं नेवाः दिवस हंगु दु । प्रधानमन्त्री पुष्पकमल दाहाल मूपाहाँकथं झाःगु ज्याझ्वलय् थःगु नुगः खँ तय्गु झ्वलय् नेवाः जातिया सभ्यता, संस्कृति व इतिहास अध्ययन, अनुसन्धानया लागिं प्रतिष्ठान गठन याय्गु खँ ल्ह्वनादिल । व हे वसन्तपुरया दबुलिं नेपाल सम्वतयात राष्ट्रिय सम्वत घोषणा याःम्ह दाहालं थ्व खँ घोषणा याःगुलिं नेवाः सभ्यता, संस्कृति व इतिहासया अध्ययन अनुसन्धानया क्षेत्रय् छगू तःधंगु उपलब्धी जुइगु जुल धइगु आशा नेवाःतय् दथुइ ब्वलंगु खः ।
नुगः खँया झ्वलय् प्रधानमन्त्री दाहालं उगु प्रतिष्ठान नेवाः समुदायया लागिं चाय्केगु खःसां मुक्कं देय्या हे नितिं जुइगु नं स्पष्ट यानादिल । ‘नेपालया सभ्यता, संस्कृति व इतिहास, भाषा, साहित्य व कलाया नितिं नेवाःतय्सं याःगु मदिक्कया संघर्षप्रति जिं उच्च सम्मान तयाच्वनागु दु । थ्व सकतांया अभिलेख दय्केमाः, अध्ययन अनुसन्धान जुइमाः । उकिं जिं थनं नेवाः अध्ययन प्रतिष्ठान दय्केगु प्रतिवद्धता छिकपिनिगु न्ह्यःने प्वंकाच्वना’ प्रधानमन्त्री दाहालं धयादिल ।
उगु हे समारोहस उपप्रधान लिसें भौतिक पूर्वाधार तथा यातायातमन्त्री नारायणकाजी श्रेष्ठं नेपाली समाजयात रुपान्तरण याय्त नेपालया भाषा, संस्कृतिया विकास याय्माःगुलिइ बः बियादिल ।
अथे हे, नेपाली कांग्रेसया नेता प्रकाशमान सिंहं नेपालयात हलिंन्यंक म्हसीकेत नेवाः सभ्यता व कलां तःधंगु योगदान बियाच्वंगु धयादिल ।
नेवाः देय् दबूया नायः पवित्र बज्राचार्यं नेवाःतय्सं थःगु अस्तित्व, पहिचान स्थापित याय्त ताः ई न्ह्यःनिसें संघर्ष यानावःगु तर राज्यं नेवाःतय्त क्वत्यलेगु ज्या जक यानावःगु धासें थःगु अधिकार व पहिचान स्थापित याय्त नेवाःत सकलें छधी जुइत इनाप यानादिल ।
वल्र्ड नेवाः अर्गनाइजेसन नेपाल च्याप्टरया नायः सुरेन्द्र भक्त श्रेष्ठं नेपालभाषायात अन्तर्राष्ट्रिय स्तरय् यंकेगु नितिं अर्गनाइजेसनं निदँ न्ह्यःनिसें मदिक्क न्हियान्हिथं गुगल ट्रान्सलेसन ज्याझ्वः यानावयागु जानकारी बियादिल ।
नेपाःलिसें हलिंन्यंकया नेवाःतय्सं थःथः च्वनावयागु देशय् दँय्दसं हलिं नेवाः दिवस हनावयागु धासें थुगु दिवसं हलिंन्यंक नेवाःतय्गु भाषा, कला, संस्कृति म्हसीकेत ग्वहालि जुयाच्वंगु दावी नं नायः श्रेष्ठं यानादिल ।
थीथी व्यक्तित्व सम्मानितः
ज्याझ्वलय् थीथी क्षेत्रय् योगदान ब्यूपिं नेवाः समुदायया व्यक्तित्वतय्त सम्मान नं याःगु खः । नेपालभाषालिसें नेपाली साहित्य क्षेत्रय् विशिष्ट योगदान बियाद्यूम्ह जनकवि दुर्गालाल श्रेष्ठयात ज्याझ्वलय् विशेष सम्मान याःगु खः ।
अथेहे, नेपालया न्हापांगु संकिपा ‘आमा’य् आमाया भूमिका म्हितादीम्ह अभिनेत्री चैत्यदेवी सिंहयात नं हंगु खः । व हे कथं, नांजाःम्ह म्येहालामि प्रवेशमान सिंहयात मदुम्ह म्येहालामि रमेश ताम्राकारया नामय् स्वनातःगु रमेश ताम्राकार संगीत सिरपालं पुरस्कृत याःगु खः । थुगु सिरपाःया राशी १५ हजार तका खः । उगु हे ज्याझ्वलय् प्रा.डा. त्रिरत्न मानन्धर, पूर्वराजदूत केदारभक्त माथेमा, पर्यटन व्यवसायी कर्ण शाक्य, उद्योगपति रुपज्योति कंसाकार, पूर्व न्यायाधीश कल्याण श्रेष्ठ, पूर्व आईजीपि सिंह बहादुर श्रेष्ठ, समाजसेवी व साहित्यकार सुवर्णकेशरी चित्रकार लिसेंयात नं हंगु खः ।
अथेहे, हस्तकला कलाकार चिनकाजी ताम्रकार, बरिष्ठ फोटो पत्रकार नातिकाजी महर्जन, गणितज्ञ व ज्योतिष देवनारायण महर्जन, अन्तर्राष्ट्रिय कुश्तीबाज मिसा मुना श्रेष्ठ, बरिष्ठ साहित्यकार मथुरा साय्मि, व कास्की नेवाः खलःयात नं सम्मान याःगु खः । सम्मानित सकलसित प्रधानमन्त्री दाहालं हनापौ लःल्हानादिल सा उपप्रधानमन्त्री नारायणकाजी श्रेष्ठं दोसल्ला व हलि नेवाः दबू नेपाः च्याटरया नायः सुरेन्द्रभक्त श्रेष्ठं खादा न्यय्काः हनादीगु खः ।
