नेवाःतय्गु अधिकार, पहिचानया लागि न्ह्यानाच्वंगु नेवाः देय् दबूया थःगु हे छेँ मदयाः नेवाःतय्गु दथुइ हे म्हमसिका च्वनेमाःगु दुःखया खँ जूगुलिं नेवाः नुगः दुपिं सकलसिया ग्वाहालि दत धाःसा नेवाःदेय् दबुया छेँ थःगु कार्यकालय् दयकेगु नेवाः देय् दबूया नायः पवित्र बज्राचार्यं धयादिल ।
वय्कलं स्वनिगलय् च्वंपिं नेवाःत थवंथवय् छप्पँछधि जुइत थाकुगु तर गुथि विधेयकया आन्दोलनं नेवाःत क्वाहावःगुलिं यानाः स्वनिगःपिने च्वपिं नेवाःत धाःसा छप्पँछधि जुयाः ज्या न्ह्याकाच्वंगुलि गर्व याय् बहःजू धयादिल ।
नेवाः देय् दबू येँ जिल्लाया दँ मुँज्या चैत्र ११ गते शनिवार जगत सुन्दर ब्वनेकुथिइ जूगु ज्याझ्वलय् नुगःखँ तयादिसें स्वनिगः विशेष प्रदेशया नायः श्री कृष्ण महर्जनं नेवाः देय् दबूया पहलय् अडान पौ बियागुया नतिजां बाग्मति प्रदेशय् नेवाः भाय् कामकाजी भाय्या रुपय् छ्यलेत निम्ह विशेषज्ञ सरकारपाखें ल्ययेगु ज्या जुइ धुंकूगु धयादिल ।
नेपालभाषाया टेलिप्याखं ख्वताबजियात विशेष हना लःल्हाःगु ज्याझ्वलय् लोककवि राजभाई जकमिं नेवाः देय् दबूया चिनाखं ब्वना दिगु ज्याझ्वलय् जिल्लाया छ्याञ्जे धनबिर महर्जनं बार्षिक कार्य प्रगतिप्रतिवेदन व दाँभरिं धर्मराज शाक्यं आर्थिक प्रतिवेदन न्ह्यब्वःगु खः । निगुलिं प्रतिवेदनय् वःगु न्ह्यसःयात नायः धनबहादुर महर्जनं थःगु मन्तव्यया झ्वलय् सकसिया सल्लाह सुझाव व न्ह्यसःयात कुला दिउगु खँ नापं वय्कलं जिल्लाया भावि ज्याझ्वःया बारे नं कनादिउगु खः ।
उगु हे ज्याझ्वलय् जिल्लाया दुज नापं अतिरिक्त क्रियाकलाप कजि बालकृष्ण श्रेष्ठं चिनाखँ ब्वनादिउगु खसा दुजः मन्दिरा श्रेष्ठं नेवाः देय् दबू किर्तिपुर नगरया नायः बुद्धिलाल ज्यापुं च्वयादिगु म्ये हालादिगु खः । ज्याझ्वः सचिव सुनिता महर्जनं न्ह्याका दिउगु खः ।
