नेवाः पत्रकार राष्ट्रिय दबूनं अन्तर्राष्ट्रिय मातृभाषा दिवसया लसताय बिज्ञप्ती पिथन

नेवाः पत्रकार राष्ट्रिय दबूया नायः नृपेन्द्रलाल श्रेष्ठं थौं अन्तर्राष्ट्रिय मातृभाषा दिवसया अबसर लाका छगु प्रेस बिज्ञप्ती नापं भिंतुना बिःगु दु । फेबररी २१ तारिखयात अन्तर्राष्ट्रिय मातृभाषा दिवसकथं हनावयाच्वंगु दु । सन् १९५२ य् बंगलादेशय् बङ्गाली भाय् (मांभाय्) न्ववाये दयेमाः धकाः अनया विद्यार्थीपिन्स यागु आन्दोलनय् आन्दोलित विद्यार्थि स्याःगु घटनायात लुमंकाः थुगु दिवस हना वयाच्वंगु खः ।
थ्व हे खँयात वाःचायेकाः नेवाः पत्रकार राष्ट्रिय दबूपाखें नं प्यदँ न्ह्यःनिसें थीथी ज्याझ्वःयासें थुगु दिवस हनावयाच्वनागु दु । थुगुसी नं थ्व हे २०७९ फागुन १२ गते शुक्रवाः नेपाल प्रेस काउन्सिलया सभाहलय् मातृभाषा दिवसया विशेष ज्याझ्वः याय्गु ग्वसाः दुगु खः दबूया नायः निपेन्द्रलाल श्रेष्ठं कनादिगु दु  । नेपाःया पत्रकारिता ख्यलय् मातृभाषा पत्रकारिताया विकास नेवाः पत्रिकप ‘बुद्धधर्म’ पाखें हे न्ह्याःगु खः । नेवाः पूर्खा धर्मादित्य धर्माचार्यजुं थौंस्वयां ९८ दँ न्ह्यः न्ह्याकूगु पत्रिका हे नेपाःया न्हापांगु मातृभाषी पत्रिका खः धयादिसें थ्व ज्यायात नेवाः पत्रकार राष्ट्रिय दबूपाखें निरन्तर न्ह्यज्याका यंकाः मातृभाषा पत्रकारिताया विकासया निंतिं निरन्तर ज्याझ्वःत यानातुं वनेगु जुइ धयादिगु दु । अथेहे वयकलं हलिंया सकल मांभाय् ह्यमिपिन्त २४ क्वःगु अन्तर्राष्ट्रिय मातृभाषा दिवसया लसताय् भिंतुना देछानाच्वना धका बिज्ञप्ती न्ह्यथनादीगु दु।