नेपालभाषाया स्टेजया प्रोग्राम व टेलिभिजनया ख्यलय् ख्यालि न्हिला प्रस्तुतिया निंतिं लोकंह्वाम्ह कलाकःमि सुरेन्द्र मानन्धरया न्हूगु नेवाः म्ये ” वा ग्वारा मैं वा ” या म्ये संकिपा म्युजिक भिडियो या सोमबार छगू ज्याझ्वःया दथुइ पितब्वज्या जूगु दु ।
नेवाः संगीतख्यःया नांजाम्ह म्येहालामि सरस्वति मानन्धर लिसेलिसें सुरेन्द्र मानन्धर, सुरेश मानन्धर व सबिना मानन्धर जाना हालादीगु थ्व म्येया च्वमि व लय् चिनामि सुरेन्द्र मानन्धर थः हे खः । थ्व म्येया निंतिं जिवित जल्मीं बाजं ग्वयादीगु खः ।
थ्व म्येया म्ये संकिपाय् सुरेन्द्र मानन्धर, रेवन्त लाल श्रेष्ठ , रबिता बके श्रेष्ठ व मन्जिला बज्राचार्य पिन्सं अभिनय यानादीगु दु ।
अथेहेतुं थ्व म्येया किपालुमि अमन महर्जन व छ्याय्फ्वाय् कःमि इन्द्र मानन्धर खः ।
सोमबार थ्व म्ये संकिपा पितब्वज्याय् पुलांम्ह मन्त्री नांजाम्ह संकिपा बन्जा रामबीर मानन्धर मूपाहाँ कथं झायादीगु खः । वयकलं नेवाः संगीतख्यः तब्या जुयावःगुलिं लसता प्वंकादिल ।
थ्व ज्याझ्वलय् नेपालभाषाया न्हापांम्ह म्युजिक भिडियो निर्देशक व सिने पत्रकार विजयरत्न असंबरें ” वा ग्वारा मैं वा ” म्युजिक भिडियो यात कया समीक्षात्मक खँ तयादीगु खःसा नांजापिं व लोकंह्वापिं म्येहालामि जुजुकाजि रन्जित व संगीता शाक्य व सन्चारकःमि विराजकाजी राजोपाध्याय पिन्सं नं उगु म्युजिक भिडियो यात कया नुगःखँ तयादीगु खः ।
