पत्रकारिता ख्यलय् न्हापांम्ह मिसाकथं साधना प्रधानयात लुमंकल । नेवाः पत्रकार दबू पाखें ११३ क्वःगु अन्तर्राष्ट्रिय नारी दिवसया लसताय् स्वम्ह मिसापिन्त साधना पत्रकारितां सम्मान यागु खः । नेपाल प्रज्ञा प्रतिष्ठानया पूर्व सदस्य नाप वरिष्ठ मिसा साहित्यकार सुलोचना मानन्धर धितालं नेपाःया न्हापाम्ह मिसा पत्रकार साधना प्रधान अधिकारीया संघर्षपूर्ण जीवनगाथा, सामाजिक ख्यलय् ह्यूपाः हयेगु कुतःया विषय केन्द्रीत जुया थःगु बिचाः तयादीगु खः ।
अथेहे आदिवासी जनजाति पत्रकार महासंघ फोनिजया नायः गजुरधन राई नं आदिवासी जनजाति मिसापिनिगु उपस्थितिया लागि स्थानीय निकायलिसे सहकार्य यानाः ज्या यायेगु व नेवाः पत्रकारपिनि थुगु ज्याय् ग्यसुलाःगु ब्वति दइगु विश्वास प्वंकादिल । वयकलं मिसापिन्त जुइगु विभेद, सामाजिक रूपान्तरण व आदिवासी जनजातिया मुद्दा ल्ह्वनेगु निति पत्रकारपिनिगु तःधंगु भूमिका दुगु खँ नं कनादिल ।
ज्याझ्वलय् क्रियाशील महिला पत्रकारया अध्यक्ष संगीता लामां थौंकन्हय् जनजाति पत्रकारपिं अप्वः थें कार्यक्रम पत्रकारिताय् लिकुनाच्वंगु खँय् असन्तुष्टी प्वंकादिसें कार्यक्रम पत्रकारिता यानाः मगा समसामायिक विषयवस्तु व खोजपत्रकारिता याय्माःगु खँ तयादिल ।
मूपाहाँ यल महानगरपालिकाया उपप्रमुख मन्जली शाक्यं प्रत्येक नागरिक छम्ह पत्रकार जूगु खँयात नालादिसें पत्रकारतय्त थकायेत ललितपुर महानगरपालिकां ग्वाहालि याय् धयादिल ।
अथेहे सभानाय कथं नेवाः पत्रकार राष्ट्रिय दबूया अध्यक्ष नृपेन्द्रलाल श्रेष्ठं पत्रकारिता ख्यलय् न्ह्यःने यकूपि नामय् नेपाल पत्रकार महासंघ व नेपाल प्रेस काउन्सिलं नुगः स्यानाच्वंगु खँ तयादिसें नेपालय् मिसा पत्रकारपिं साधना प्रधान व कामक्ष्यादेबी २००८ सालय् महिला नांया पत्रिकाया सुरुवात याःगु खःसा थौंतक नेपाःया न्हापांम्ह मिसा पत्रकार सु धइगु इतिहास पिकाये मफूगु दुःखया खँ खः धका धयादिल । अथेतु पत्रकारपिन्त संगठित यायेगु ज्यायाम्ह सत्यनारायण बहादुर श्रेष्ठ नाप नेपाःया न्हापाम्ह मातृभाषाया पत्रकार धर्मादित्या धर्माचार्यया तक गन पत्रकारिता ख्यलय् हयाच्वंगु मदु धका धयादीसे आः याकन हे नेपाःया न्हापाम्ह मिसा पत्रकार सू धइगु छगु राष्ट्रिय गोष्ठि यायेगु जुइ धका धयादीगु खः।
थुगुहे ज्याझ्वलय् स्वम्ह मिसापिन्त साधना पत्रकारिता सम्मान लःल्हाःगु खः ।
आदिवासी जनजाति पत्रकारपिनिगु हकहितया निम्ति मदिक्क ज्यायाना च्वम्ह लिसं २०७४ साल निसें नेपाल टेलिभिजनय् कार्यक्रम निर्माताकथं व निगु दशक न्ह्यःनिसें रेडियोकर्मिकथं ज्यायानाच्वनादीम्ह अन्जना शिल्पकार, २०६१ सालनिसें सगरमाथा एफएमय् ज्या यानाः २०७० साल निसें थाहा सञ्चारपाखें समाचार सम्पादन व तामाङ्ग भाषायात सेवा यानाच्वम्ह सन्च कुमारी लामा तामाङ्ग व २०६६ सालनिसें गोरखापत्रं पत्रकारिता यानादिम्ह व फोटो पत्रकारिता ख्यलय् यक्व न्ह्यःनिसें सक्रियम्ह कविता थापायात सम्मान लःल्हाःगु खः ।
वय्कःपिन्त दोसल्ला न्ययेकाः, स्वांम्हा कोखायेका अले सम्मान पत्र लःल्हाःगु खः । दवूया उपाध्यक्ष रचना श्रेष्ठया संयोजनय् जूगु ज्याझ्वलय् महासचिव केके मानन्धरं विषय प्रवेश याकादीगु खःसा सहसचिव सुनिता महर्जन व यल कचाया नायः मञ्जु बज्राचार्यं लसकुस अले सदस्य अनिता डगोलं ज्याझ्वः न्ह्याकूगु खः ।