एसीसी प्रिमियर कपय् नेपाल व युएई समूह विजेता

एसीसी प्रिमियर कपय् थौं जूगु कासाय् कतारयात ६८ रनं बुकाः नेपाल समूह विजेता जूगु दु ।
किपूया त्रिवि क्रिकेट मैदानय् जूगु कासाय् नेपालं ब्यूगु १५८ रनया तातुनाय् न्ह्याःगु कतार ८९ रन जक दय्के फुगु खः । कतारयात अःपुक अलआउट यायेगु झ्वलय् नेपालया सन्दीप लामिछानें ५ विकेट काःगु खः । थुकथं हे सोमपाल कामीं ३ व ललित राजवंशीं २ विकेट काःगु खः ।
टस बुनाः न्हापा पहिले ब्याटिङ याःगु नेपालं ४०.३ ओभरय् फुक्कं विकेट तंकाः १५७ रन दय्कूगु खः ।
नेपाःया निंतिं झिगूगु ल्याखय् ब्याटिङ यायेत वःम्ह सन्दीप लामिछानें दकले अप्वः ४२ रन दय्कूगु खः । ५८ बल म्हितूम्ह वय्कलं ६ चौका कय्कूगु खः । लामिछाने हे थौंया कासाया प्लेयर अफ दि म्याच जुइत ताःलात ।
थौंया कासाय् कप्तान रोहितकुमार पौडेलं २७, आसिफ शेखं १९, दीपेन्द्र सिंह ऐरीं १२, सोमपाल कामी व आरिफ शेखं ११÷११ रन दयेकूगु खःसा मेमेपिं कासामिपिसं निगू ल्याःया रन दय्के मफत ।
कतारया निंतिं अमिर फारुकं ४ विकेट काःगु खःसा ओवाइस अहमदं ३ विकेट थःगु नामय् च्वकूगु खः ।

थुकथं हे समूह ‘बी’ थौं जूगु कासाय् कुवेतं हङ्गकङ्गयात बुकुसेंलि उपविजेता जुसें कुवेत सेमिफाइनलय् दुथ्यंगु दु । थ्वयां न्ह्यःहे युएई सेमिफाइनलय् थ्यने धुंकूगु खः । थौंया कासाय् हङ्गकङ्ग त्याःगु खःसा हङ्गकङ्ग समूह विजेता जुइगु खः । तर कुवेतलिसेया कासाय् हङ्गकङ्ग ३० रनं बुसेंलि हङ्गकङ्गया सेमिफाइनल थ्यंकेगु म्हगस त्वाःदःगु दु ।