नेपाःया क्रिकेटय् दकले अस्थिर पद खः राष्ट्रिय प्रशिक्षक । लिपांगु छुं दसुत स्वय्गु खःसा नेपाःया राष्ट्रिय टिमया भाला काःपिं विदेशी प्रशिक्षकतय्सं थःथःगु कार्यकाल पूवंकुगु खनेमदु । थ्व स्वयां न्ह्यःया प्रशिक्षकत उमेश पटवाल (भारत), डेभ ह्वाटमोर (अस्ट्रेलिया), पुबुद दसनायके (श्रीलङ्का), मनोज प्रभाकरं (भारत) थःगु कार्यकाल पूमवंकं हे राजीनामा बिल । प्रशिक्षक हिलीगु व्यवसायिक क्रिकेटया छगु पक्ष खः । अथेखःसां सुं प्रशिक्षकं नं थःगु सम्झौताअनुरुप नेपाःया राष्ट्रिय टिमया भाला पूमवंकूगु धाःसा भचा अस्वभाविक हे ताः ।
नेपाःया क्रिकेटया इतिहास स्वय्गु खःसा क्यानं स्वदेशी स्वयां विदेशी प्रशिक्षकयात हे अप्वः विश्वास याःगु दु । वंगु वालय् नं नेपाल क्रिकेट संघं (क्यान) भारतया मोन्टी देसाईयात प्रशिक्षक नियुक्त यात । नेपाःया राष्ट्रिय क्रिकेट टिमय् छम्ह विदेशी प्रशिक्षकया कथं मोन्टी छगू मेगु कडी खः । आः नेपाली क्रिकेट टिमका रुपान्तरण याय्गु भाला प्रशिक्षक मोन्टीयाके वःगु दु । नेपाःया क्रिकेटया थ्व इलय् स्थिती बांलाः मजू । नेपाली क्रिकेट विवाद हे विवादय् तक्यनाच्वंगु दु ।
नेपाःया राष्ट्रिय क्रिकेट टिमया कासा कमजोर जुयाच्वंग दु । थ्व हे इलय् नेपाःया ग्लोबल क्रिकेटर सन्दीप लामिछाने नाबालिगया बलात्कारया आरोपय् मुछे जुल । थुकिं यानाः नेपाःया क्रिकेटय् भुखाय् ब्वल । नेपाःया दकले तःधंगु फ्रेञ्चाई लिग धयातःगु नेपाल टि२० पाखें नं नेपालं बदनामी कमेयात । थ्व कम्पिटिसनय् नेपाली राष्ट्रिय क्रिकेटरतय्त स्पट फिक्सिङया आरोपय् पक्राउ यात । थुकिं यानाः हलिमय् नेपाली क्रिकेटया चर्चा नकारात्मक कथं जुल ।
थज्याःगु प्रतिकूल परिस्थितिइ नेपाली क्रिकेट टोलीया प्रशिक्षक जूम्ह मोन्टीं फुक्क हाथ्या पार याइगु भलसा कयाच्वंगु दु । थुकिया कारण नं दु । दकले तःधंगु कारण ला मोन्टी नेपाःया क्रिकेटयात दशक स्वयां अप्वः न्ह्यःनिसेँ ‘वाच’ यानाच्वंम्ह प्रशिक्षक खः । वय्कः छम्ह अनुभवी प्रशिक्षक नं खः । उकीसनं मोन्टियात विश्व क्रिकेटय् उकृष्ट ब्याटिङ प्रशिक्षकमध्ये छम्ह माने यानातःगु दु । क्रिकेटय् स्वंगू पक्ष ब्याटिङ, बलिङ व फिल्डिङ यक्व हे महवपूर्ण खः । उकीसनं नेपाल बलिङ, फिल्डिङया तुलनाय् ब्याटिङय् भचा कमजोर नं खः । थ्वः हुनिं नं मोन्टिया आगमन नेपाली क्रिकेटया नितिं फाइदाजनक हे जुइ धइगु भलसा काय्फइ ।
नेपाःया राष्ट्रिय क्रिकेट टिमया प्रशिक्षक जुइत हलिंन्यंकनं २४म्ह प्रशिक्षकतय्सं निवेदन ब्यूगु खः । उकी नं मोन्टिनापं नेपाःया पूर्व प्रशिक्षक डेभ ह्वाटमार, श्रीलङ्काया धम्मिका प्रसाद, दक्षिण अफ्रिकाया रसल क्रेग डोमिंगो व न्युजिल्यान्ड टि २० क्रिकेटया पूर्व प्रशिक्षक ग्लेन पोकनल ‘सर्टलिस्टेड’ चयन जूगु खः । थुपिं न्याम्हेसित अन्तर्वार्ता काय्धुंकाः क्यानं मोन्टियात ल्यल ।
मोन्टिया नेपाली क्रिकेटनापया न्हापांगु जिम्मेवारी आइसीसी विश्वकप लिग २ त्रिदेशीय एक दिवसीय क्रिकेट श्रृंखला खः । नेपालय् जुइगु त्रिदेशीय श्रृंखलाय् नामिबिया व स्कटल्यान्ड दु । मोन्टिं आइसीसी विश्वकप लिग २ लय् धिसिलाःगु टिमत नामिबिया व स्कटल्यान्डयात बुकाः थःगु पदार्पणयात अविस्मरणीय याइगु अपेक्षा याःगु दु । त्रिदेशीय श्रृंखलाय् नेपालं न्हापांगु कासा फागुन २ गते नामिबियानाप म्हितीगु जूगु दु । नेपालं फागुन ५ गते स्कटल्यान्ड, फागुन ६ गते नामिबिया व फागुन ९ गते हानं स्कटल्यान्डनापं म्हिती ।
न्हय्गू टिमया ब्वति दुगु आईसीसी विश्वकप लिग–२ लय् नेपाल खुगूगु थासय् दु । स्कटल्यान्ड न्हापांगु व नामिबिया स्वंगूगु ल्याखय् लानाच्वंगु दु । उकी नं नेपाःया निंितं फुक्क कासा अःपुइमखु धाःसां पाइमखु । विश्वकप लिग २ लय् नेपालं अझ १२ कासा म्हितेमानि । थुकी शीर्ष न्यागू ल्याखय् लाय्त नेपालं म्ह्वतिं नं ९ कासा त्याकेमाः । थ्व आज्जु पूवंकाः नेपालया एकदिवसीय मान्यतायात कायम याय्गु हाथ्या नं प्रशिक्षक मोन्टीयात दु ।
थ्वः श्रृंखलाया नितिं प्रशिक्षक मोन्टीं पूर्व नायः सन्दीप लामिछानेयात नं ल्यःगु दु । थुकिं नं थगुुसीया नेपाली क्रिकेट टिमं सकसिया ध्यान सालाच्वंगु दु । सन्दीपयात नाबालिगया बलात्कारया आरोप दु । उच्च अदालत पाटनं २० लाख धरौटिइ सन्दीपया त्वःतेत आदेश बिल । अनं लिपा क्यानं सन्दीपयात बन्द प्रशिक्षणय् सःतूुगु खः । सन्दीप टिमय् दुहांवःसां रोहित पौडेलया कप्तानी निरन्तर दु । स्पीनर सुर्य तामाङ न्हापांगु खुसी राष्ट्रिय सिनियर टिमय् लाःगु दु । ज्ञानेन्द्र मल्ल, दीपेन्द्रसिंह ऐरी, कुशल भुर्तेल, आसिफ शेख, कुशल मल्ल, सन्दीप जोरा, सोमपाल कामी, करण केसी, ललितनारायण राजवंशी, गुलशन झा व भीम सार्की नं टिमय् दु ।
नेपाःया मध्यक्रमया थां कथं कयातःम्ह अलराउन्डर आरिफ शेखयात धाःसा बेवास्ता याःगु दु । आरिफनापं विकेट किपर प्रारम्भिक ब्याट्सम्यान अर्जुन साउद, प्रतिस जिसी व मौसम ढकालयात वैकल्पिकय् तयातःगु दु ।
प्रशिक्षक मोन्टी सन् २०१७ य् नं नेपाली क्रिकेटय् आवद्ध जुइधुंकूगु दु । व इलय् मोन्टिं ब्याटिङ सल्लाहकार जुयाः नेपाली क्रिकेटया सेवा याःगु खः । मोन्टी प्रशिक्षक जुबलय् यु १९ एसिया कपय् नेपालं भारतलाई बुकाः इतिहास नं दय्कल । आः तक्क नेपालं क्रिकेटय् भारतयात बुकूगु थ्व छक्वः जक खः । मोन्टीया अनुभवया खँ ल्हाय्गु खःसा नेपालय् आवद्ध जुइ न्ह्यः वय्कलं स्वदँ वेस्ट इन्डिजया ब्याटिङ प्रशिक्षक कथं ज्याः यानादीगु खः । मोन्टीं वेस्ट इन्डिज, नेपाल, अफगानिस्तान, संयुक्त अरब इमिरेट्स, क्यानाडानापं आइपिएलय् गुजरात लायन्स, राजसन रोयल्स, पञ्जाब किङ्स इलेभेन व रणजी टिम आन्ध्र प्रदेशया प्रशिक्षक जुयादीधुंकल ।