नेपाल टी २० लिगया बच्छि कासा क्वचायेधुंकाः पोखरा एभेन्जर्सं न्हापांखुसी कासा त्याकूगु दु । कथंहंक न्यागू कासा बूगु पोखरां लिगय् न्हापांखुसी त्याकूगु खः । थुगु कासा त्यायेवं पोखरां लिगया प्ले अफ म्हितीगु सम्भावना ल्यंकूगु दु ।
स्वंगूगु विकेटया निंतिं आशिफ शेख व कुशल मल्लं ५२ रनया साझेदारी यात । ३३ बल म्हितूम्ह आशिफं २ चौका व २ छक्का दय्काः करण केसीया ल्हातं क्याच आउट जुल।
कुशल मल्लं ४० रनया योगदान बिल। वं २२ बलय् ५ छक्का कय्कल। सिद्धान्त लोहनी २३ रन तन। अमिर हम्जां १२ व कप्तान उपुल थरांगा ९ रनय् आउट जुल।
फारवेष्टया करण केसी, प्रकाश जैसी व उमेर अलिं समान २ विकेट काल। भुवन कार्कीया नामय् छगू विकेट जुल।
वयांन्ह्यः किपूया त्रिवि क्रिकेट मैदानय् टस त्याकाः ब्याटिङ याःगु फारवेष्टं निर्धारित २० ओभरय् ९ विकेट त्वःफिकाः सच्छि व ८७ रनया योगफल तयार याःगु खः ।
फारवेष्टया उमैर अलीं सर्वाधिक ४२ रनया योगदान बिल। २६ बलया सामना यानाः वं ५ छक्का कय्कल। ओपनर देव खनाल ३३ व हसिम अन्सारी १७ रनय् पवेलियन लिहाँ वन । ३१ बलया सामना याःम्ह देवं ३ चौका व १ छक्का कय्कल ।
हसिमं ७ बलय् २ चौका व १ छक्का कय्कल। कप्तान हस्मतुल्लाह शाहिदी ४ रनय् आउट जुल। भिम सार्की १७, विनोद भण्डारी ११ व हरिशंकर शाह ५ रनय् आउट जुल।
रसिद खान ३२ व प्रकाश जैसी शुन्य रनय् क्याच आउट जुल। करण केसी १२ रनय् नटआउट जुल।
पोखराया निंतिं जहिर खान याकःचां ३ विकेट काःगु खः । वं थःगु स्पेलय् २४ रन खर्च यात । तुल थापा व अमिर हम्जां २–२ विकेट काल।
विपिन खत्री व कुशल मल्लं १–१ विकेट थःगु नामय् यात ।