नेपाः देय्या प्रिन्स दाहाल विश्व ब्याडमिन्टनया जुनियरपाखेया वरियताय् शीर्ष थासय् थ्यंकेत ताःलाःगु दु । विश्व ब्याडमिन्टन महासंघं पितब्यूगु मिजं जुनियरपाखेया बरियताकथं १९ दँ दुम्ह न्हापांखुसीइ शीर्ष थासय् थ्यंगु खः । वया १० द्वः न्यासः ल्याः दु ।
थुकथं हे जुनियरपाखे निगूगु बरियताय् मलेसियाया जस्टिन होह गुद्वः न्यासः व ९० ल्यः दुसा मलेसियाया हे फाजरिक मोहमद रजिफ खुद्वः गुसः व २५ ल्याःलिसें स्वंगूगु थासय् दु ।
नेपाःया जुनियर कासामि दाहालया थ्व उपलब्धी नेपाली ब्याडमिन्टनं काःगु दकले तःधंगु सफलता खः । व्यक्तिगत व देय्या हे निंतिं उल्लेख्य उपलब्धि जूगु दाहालया पाजुलिसें व्यवस्थापक कमलेश निरौलाया धापु दु ।
ब्याडमिन्टन प्रशिक्षक जयन्त श्रेष्ठं दाहालया सफलतां मेमेपिं नेपाःमि ब्याडमिन्टन कासामिपिन्त हःपाः दुगु कनादिल ।
दाहाल आतक गुगुं नं विभागीय क्लबय् आबद्ध मदु । सुदूरपश्चिम प्रदेशं हे ब्याडमिन्टन म्हिता वयाच्वंम्ह दाहाल विसं २०७६ मङ्सिरय् जारी विश्व बरियताय् न्हापां ३२ गू थासय् थ्यंकेत ताःलाःगु खः । उगु हे दँय् पुसय् जूगु बरियताय् वं १४ गू थासय् व लिपांगु वालय् १० गूगु थासय् थ्यंगु खः ।
विश्व ब्याडमिन्टन महासङ्घं वाःपतिकं विश्वभरया जुनियर व सिनियर कासामिया वरियता सार्वजनिक यायेगु यानाच्वंगु दु । दाहाल थौंकन्हय् यलया लगनखेलय् च्वंगु पिनागल कलेजय् कक्षा ११ य् ब्वनाच्वंगु दु ।
थथे हे विश्व ब्याडमिन्टन महासङ्घं जारी याःगु महिला जुनियरपाखेया बरियताकथं नेपाःया मिसा कासामि रसिला महर्जन १९ गू थासय् लाःगु दु ।
