नेपाःया दकले तःधंगु व संसारया दकले अप्वः विधाय् सिरपा बियाः वर्ल्ड रेकर्ड तयेगु तातुनाः ग्वसाः ग्वःगु नेपालभाषा स्टार म्यूजिक भिडियो अवार्डया निक्वःगु संस्करणय् सिरपा त्याकादीपिन्त व अवार्डय् थीथी कथं ग्वाहालि यानादीपिंन्त सुभाय् बिउकथं दसिपौ देछासे औपचारिक रुपं समापन ज्याझ्वः क्वचायेकुगु दु ।
शुक्रबार ख्वपःया यो यो बेङ्क्वेटय् जूगु ज्याझ्वलय् अवार्ड विजेता व जीथी सम्मानित व्यक्तित्वपिन्त आयोजक संसार क्रिएसन्सपाखें विजेताया दसिपौ व आर.बि. फिल्म्सपाखें भिन्तुना पौ नं देछागु खः ।
ज्याझ्वलय् विशिष्ट पाहाँ कथं झायादीम्ह संसार क्रिएसन्स व आर.बि. फिल्म्स नापं याना निगुलिं संस्थाया सल्लाहकार सिने पत्रकार विजयरत्न असंबरें सकसित विजेताया दसिपौ देछानादीगु खःसा आर. बि. फिल्म्सया प्रबन्ध निर्देशक रविन्द्र शाहीं खादाँ न्येयकादीगु खः ।
उगु ज्याझ्वलय् भक्तपुर इन्टरनेशनल हस्पिटलया उपाध्यक्ष अशोक कुमार श्रेष्ठं आर बि फिल्म्सपाखें देछागु भिन्तुना पौ लःल्हानादिइगु खः ।
थःगु नुगःखँ तयेगु झ्वलय् विशिष्ट पाहाँ सिने पत्रकार असंबरें नेपाल टेलिभिजनय् नेपालभाषाया न्हापांगु टिभि ज्याझ्वः हसना चलेयाना बले नेपालभाषां न्ववायेगुलिइ हे प्रतिबंध तयाबिउगु अवस्थायात लुमंका दिसे उगु प्रतिबन्ध चिइकेगु निंतिं तःधंगु संघर्ष याये माल धका धयादिल । अज्यागु दक्वं पंगः चिइका न्ह्यावःगु नेपालभाषाया संचार व संगीतख्यः थौं झनझन तब्या जुया वया च्वंगुलिं लसता प्वंकादिल। वय्कलं नेपालभाषाया संगीतख्यः कःघाना स्वतन्त्रसंसार महर्जनया कुतलं जुया च्वंगु अवार्डं ज्याझ्वः यात सकसिनं नुगः तफा याना ग्वाहालि यायेमा धका नं धयादिल ।
आर. बि. फिल्म्सया प्रबन्ध निर्देशक शाहीं लसकुस न्वचु तयेगु झ्वलय् कला क्षेत्र व उकि नुगः क्वसायेका वया च्वंपिं कलाकःमि पिन्त माया मतिना यानादीत व सहयोग यानादिइत इनाप यानादिल ।
ज्याझ्वःया सभानायः संसार क्रिएसन्सया क्रिएटिभ डाइरेक्टर स्वतन्त्र महर्जनं थ्व अवार्ड यात अझ अप्वः माया यानादिइत इनाप यासे सकसिया हःपाः तिबः दतधाःसा स्वक्वगु प्यक्वगु जक मखसे संस्करणया ल्याः अप्वयेका यंकेगु प्रतिवद्धता प्वंकादिल ।