यल महानगरपालिका वडा १६ कलाकार समितिं लोक, शास्त्रीय संगीतय् समर्पितपिं कलाकारपिनिगु सृजना न्ह्यब्वयाः श्रीपञ्चमी शास्त्रीय संगीत नखः हंगु दु । श्रीपञ्चमीया लसताय् यल लाय्कूलिइ जूगु थुगु ज्याझ्वः कलाकार विशाखा शाक्यपाखें महामञ्जुश्री चर्यानृत्य न्ह्यब्वयाः न्ह्याःगु खः । यल महानगरपालिका १६ वडा अध्यक्ष निर्मलरत्न शाक्यं सभापतित्व ग्रहण यासें लसकुस यानादीगु झ्वलय् “सांस्कृतिक, सांगीतिक ख्यलय् थीथी ज्या यायेगु झ्वलय् शास्त्रीय संगीतया थुगु ज्याझ्वः छगू न्हूगु आयाम जूगु” खँ न्ह्यथनादिल । ज्याझ्वःया मूपाहां यल महानगरपालिकाया मेयर चिरिबाबु महर्जनं अमूर्त सम्पदा संरक्षणय् ललितपुर महानगरपालिका १६ वडाया भूमिका नेतृत्व यानादीगु न्ह्यथंसें महानगरपालिकां थुगु ख्यलय् अझ धिसि धायेक पलाः छीगु खँ कनादीगु खः । ज्याझ्वलय् संगीतया माध्यमं ह्यूपा थनेगु नितिं सक्रिय “प्लइङ फर चेञ्ज नेपाल”पाखें मीना प्रजापति, उषा तिवारी, भक्तबहादुर कार्की, सुमीत श्रेष्ठ, आषिश शाक्य, कृष्णदेवी महर्जन, सन्तु महर्जन व सविना महर्जनपिन्सं सरस्वती वन्दना हालादीगु खःसा नेपालभाषाया लोकं ययेकूगु म्ये “सिरसाया हेकु” व “व छु गल्ली” हनाः भिन्तुना महर्जन, श्रीजन महर्जन, आगमन महर्जन, सुष्मा श्रेष्ठ, दिपेश तामाङ, निरञ्जना मानन्धर, पदम आले, भिदी क्षेत्री व आकाश तामाङं बाँसुरीया धूनय् फोकलोरी न्ह्यब्वयादीगु खः थुकी मगःखिं थानादीम्ह सीजन महर्जन, धिमे थानादीम्ह प्रतीक महर्जन, टेन्बुरिन थानादीम्ह रामचन्द्र भण्डारी, ताः थानादीम्ह समन महर्जन, गितार थानादीम्ह पेशन श्रेष्ठ खः ।
थुगु पुचःया लोकंह्वाःगु म्ये “सिरिसिरि फसं जितः”य् विपाशा महर्जन, अलोयाना डंगोल, सुकृति बज्राचार्य, दिपिका महर्जनं प्याखं हुलादीगु खः ।
ज्याझ्वःया निगूगु न्ह्यब्वयाकथं वाद्य शिरोमणी गणेशलाल श्रेष्ठया नामय् नीस्वनातःगु वाद्यशिरोमणी संगीत घरानां राग वृन्दावणी सारंग न्ह्यब्वयादिल । थुगु घराना निरन्तर न्ह्याकेगुलिइं सक्रियम्ह शैलेन्द्र शाक्यं तबला थानादीगु थुगु न्ह्यब्वयाय् युनिका बज्राचार्य, जोया महर्जन, स्वीकृति महर्जन, युस्ना महर्जन, रुपक महर्जन, अप्रिलशा महर्जन, आहाना महर्जन, निष्ठा अमात्य, शिक्षा श्रेष्ठ, रुजेन धाख्वा व निभाः बज्राचार्यं भ्वाइलिन वादन यानादीगुख खः ।
ज्याझ्वःया स्वंगूगु न्ह्यब्वयाकथं नेवाः लोक संगीतया अभिलेखीकरण यासें संरक्षण व प्रचारया नितिं सक्रिय जुयाच्वंगु प्रोजेक्ट बाजा नेपालं न्ह्यब्वःगु राग चारुकेशीं ज्याझ्वलय् रौनक तनाबिल । थुगु न्ह्यब्वयाय् सरोद वादन सुरेशराज बज्राचार्य, मिलन तण्डुकार बेला वादन, तबला, खिं वादन विपु श्रेष्ठं यानादीगु खः । थुगु हे पुचलं सुरेशराज बज्राचार्यया श्रृजना “एराउन्ड द जंगल” नं न्ह्यब्वःगु खःसा थुगु न्ह्यब्वयाय् विजय कायस्थं बबूचा थानाः खः ।
ज्याझ्वलय् कलाकारपिनिगु पुचः व ज्याझ्वःया ग्वाहालिमि नेवाः सवाःयात सुभाय् पौ देछायेगु ज्या जूगु खःसा नेवाः पत्रकार राष्ट्रिय दबू केन्द्रीय समिति व नेवाः देय् दबू यल कचाया न्हूगु ज्यासना पुचःयात भिंतुना पौ नं देछाःगु खः । प्रदेशसभा सांसद रामकृष्ण चित्रकारयागु नं ब्वति दुगु थुगु ज्याझ्वः कलाकार समितिया संयोजक सुरजवीर बज्राचार्य, सचिव अनुप शाक्य व कोषाध्यक्ष सलोना बज्राचार्यं न्ह्याकादीगु खः । नील शाक्य, भूपेन्द्र बज्राचार्य, मोहिद्दिन खान, अमोघवीर बज्राचार्य, श्रुयति शाक्य, अमर चित्रकार, निशिला शाक्य, सिम्रन शाक्य समितिया दुजःपिं खः ।
समितिं वरिष्ठपिन्त हना, सक्रियपिन्त दबू व नवप्रतिभापिं मालेगु प्रशिक्षित यायेगु ज्या यानाः वयाच्वंगु दुसा झीगु संस्कृतिइ सांगीतिक (गायन, नृत्य, अभिनय) परम्परा मद्दिक्क न्ह्याकेगु नितिं नं ज्या यानाः वयाच्वंगु जुल ।
