स्वक्वःगु अन्तर्राष्ट्रिय मातृभाषा पत्रकारिता सम्मेलन थ्व हे वइगु साउन २४ निसें २७ गतेतक येँय् जुइगु जूगु दु ।
नेपाल आदिवासी जनजाति पत्रकार महासंघ (फोनिज) व नेवाः पत्रकार राष्ट्रिय दबूया मंकाः ग्वसालय् च्वंगु मुँज्यां थथे निर्णय याःगु खः।
फोनिजया ग्वसालय् पत्रकार दबूया संयोजन व सार्क जनलिस्ट फोरमया ग्वहालिं थुगु ज्याझ्वः न्ह्याइगु जानकारीबिसें सम्मेलनया प्रारम्भिक योजना नाप कार्यक्रमबारे फोनिजया महासचिव समीर बलामीं कार्ययोजना न्ह्यब्बःगु खः।
सम्मेलनय् हलिन्यंकं करिब ४० देशं मातृभाषा पत्रकारिता यानाच्वंपिं पत्रकारतय्सं ब्बति काइगु अनुमान यानातःगु दु। प्यन्हुयंकं जुइगु ज्याझ्वलय् प्यानल डिस्कसन, कार्यपत्र प्रस्तुति, सांस्कृतिक झाँकी प्रदर्शन नापं नेपाःया पर्यटकीय थाय् अवलोकन नं याकेगु ज्याझ्वः दुगु ग्वसाःखलकं धाःगु दु ।
सम्मेलनया मू तातुना मातृभाषा पत्रकारिताया विकास यानाः व्यावसायिक दयकेगु, सरकारी नीतिइ मातृभाषा पत्रकारिताया महत्त्व स्थापित याकेगु व सम्मेलन लिपा राष्ट्रिय व अन्तर्राष्ट्रिय स्तरय् नेपाःया मातृभाषा पत्रकारिताया उपलब्धिया बारे प्रचार–प्रसार यायेगु जुइ धका ग्वसाः खलकं धाःगु दु। नापं भाषा, लिपि, संस्कृति, संस्कार नाप सम्पदाया संरक्षण व अध्ययन–अन्वेषण तक जुइ कथं सम्मेलनया आज्जु दु।
थ्व स्वया न्ह्यः निकः तक नेवाः पत्रकार राष्ट्रिय दबूया ग्वसालय् अन्तर्राष्ट्रिय मातृभाषा पत्रकारिता सम्मेलन जुइ धुंकुगु खः। सम्मेलनय् सार्क जर्नलिस्ट फोरम व फोनिजं सहकार्य याःगु खः।
तयारी मुँज्याय् नेवाः पत्रकार राष्ट्रिय दबूपाखे नृपेन्द्रलाल श्रेष्ठ, सुनिल महर्जन, सुरेन्द्र भक्त श्रेष्ठ, केके मानन्धर, राजु नापित, प्रजित शाक्य व तेज नारायण महर्जनं ब्बति काःगु खःसा फोनिजपाखे लक्की चौधरी, समीर बलामी, अर्जुनबहादुर तामाङ, प्रविण श्रेष्ठ, प्रदीप लेखी, अमिर लामा, राजु राजदेव, प्रविण किराँतीपिन्स ब्बति काःगु खः ।
