येँ महानगरपालिका १२ वडाया ग्वसालय् थुगुसी स्नातकाेत्तर तगिं ताःलाःपिं वडाबासीपिनिलिसें १२ वडा दुनेया पेशाकर्मीपिन्त हनीगु जूगु दु ।
थाैं छगू पत्रकार सम्मेलनया ग्वसाःग्वसें ज्याझ्वःया जानकारी ब्यूगु खः । थ्व हे जेठ ११ गते दुने नां दुथ्याकादीपिं विद्वतवर्ग व पेशाकर्मीपिन्त हनेगु जूगुलिं सम्बन्धित व्यक्तित्वपिसं इलय् हे वडा ज्याकुथिइ स्वापू तयेत इनाप याःगु दु ।
येँ मनपा १२ वडाया अध्यक्ष बालकृष्ण महर्जनया सभानायःसुइ जूगु ज्याझ्वलय् हना ज्याझ्वःया कजि ज्ञानीबाबु सिंहं ज्याझ्वःया बारे कनादीगु खः ।
१२ वडापाखें वंगु २०८१ व ८२ सालय् थीथी व्यक्तित्वपिन्त हनेज्या याये धुनागु जानकारी बियादिसें उबले त्वःफ्यूपिसं नं नां दुथ्याकेत वय्कलं इनाप यानादिल । न्हापा स्नातकाेत्तरपिन्त जक हनागुली थुगुसी धाःसा स्नातक जुयाः पेशा न्ह्याकाच्वंपिन्त नं हने त्यनागु जानकारी बियादिसें कजि महर्जनं इञ्जिनियर, डाक्टर, अडिटर, चार्टर्ड एकाउण्टेण्ट, पाइलट, ब्वनेकुथिया प्रधानाध्यापक व राष्ट्रिय अन्तरार्ष्ट्रिय कासाय् पदक त्याकूपिन्त नं हनेज्या यायेगु खँ कनादिल । थुकिया निंतिं सम्बन्धित काउन्सिलय् दर्ता जूगु प्रमाणपत्र नं पेश यायेमाःगु वय्कलं कनादिल ।
ज्याझ्वःया अाज्जुबारे कनादिसें वडा अध्यक्ष बालकृष्ण महर्जनं वडाबासी पेशाकर्मी व विद्वत वर्ग म्हसीका वडाबासीपिन्त ज्या काये अःपुकेत थुगु ज्याझ्वलं ग्वाहालि याइगु बिचाः प्वंकादिल ।