नेपाःया चर्चित व लोकंह्वाम्ह कलाकार धिरेन शाक्यं अभिनय यानादीगु नेपालभाषाया म्ये “ मिखा भाय्“ छगू ज्याझ्वःया दथुइ सार्वजनिक जूगु दु । नेपाःया तसकं ना्जाम्ह गायिका अन्जु पन्तं हालादीगु थ्व म्येया म्युजिक भिडियो किर्तिपुरया किर्तिपुर सिनेप्लेक्सय् बुधबार पितब्वज्या यागु खः ।
पितब्वज्या ज्याझ्वलय् वरिष्ठ गायक जुजुकाजी रन्जित मूपाहाँ कथं झायादीगु खःसा अग्रज सिने पत्रकार विजयरत्न तुलाधर असंबरे विशेष पाहाँ कथं झायादीगु खः ।
उगु ज्याझ्वलय् अभिनेता धिरेन शाक्यं उगु म्युजिक भिडियोस ज्यान यानाबलेया अनुभव मनादिसे व छगु सुखद अनुभुती खः धका धयादिलसा नेपाली फिचर फिल्मया म्येया शुटिंग यानागु थेंजागु अनुभुति जूगु खँ कनादिल ।
सार्वजनिक म्येया समीक्षा यायेगु झ्वलय् पत्रकार असंबरें म्ये दर्शक श्रोताया मन त्याकेफइगु खुबी दुगु खँ कनादिल । केबिएस लुभु प्रोडक्शन हाउसपाखें निर्माण याःगु उगु म्युजिक भिडियोया परिकल्पनाकार एवम् निर्माण व्यवस्थापक केबिएस लुभुं लसकुस नुगःखँ तयादीगु उगु ज्याझ्वलय् म्युजिक भिडियोया कलाकार , प्राविधिक एवम् ग्वाहालिमिपिन्त लुमन्ति चिं नं देछागु खः ।
थ्व म्युजिक भिडियोया निर्देशक एवम् नृत्यनाटक निर्देशक बालमुकुन्द प्रजापति , छाँयाकार एवम् सम्पादक शैलेश श्रेष्ठ लुभु , गीतकार प्रकाश दिप श्रेष्ठ , संगीतकार गोविन्द ह्युमत , संगीत संयोजक जिवित जल्मी खःसा म्युजिक भिडियोस धिरेन शाक्यनाप रुखसाना महर्जनं जोडिया रुपय् साथ बियादीगु दु ।