काठमाडौं महानगर १२ वडाया ग्वसालय् वंगु फागुन ६ गते बुधवाः जूगु ज्येष्ठ नागरिक भ्रमण ज्याझ्वलय् ब्वति काःपिं ज्येष्ठ नागरिकपिन्त विशेष रुपं सम्मान याःगु दु ।
१२ वडाया अध्यक्ष बालकृष्ण महर्जनया सभापतित्वय् जूगु ज्याझ्वलय् १२ वडाया ७० दँ स्वयां अप्वः उमेरया स्थानीय बासिन्दापिन्त हंगु खःसा स्वम्ह ज्येष्ठ नागरिकपिन्त विशेष रुपं सम्मानपत्र बियाः हंगु खः ।
ज्याझ्वलय् चल्खुया ८८ दँ दुम्ह कृष्णदेवी सुवाल, दुरुबहा: कुमाननीया ८७ दँया पुनमाया प्रजापति व खोल्चापाखाया ८८ दँया सुर्ज शाहीयात विशेष रुपं सम्मान याःगु खः ।
येँया नागार्जुन नपा वडा नं ३ य् च्वंगु इचंगुनारायण देगलय् धार्मिक भ्रमण ग्वसाःग्वःगु खः। भ्रमणय् ज्येष्ठ नागरिक, वडा परिवार, स्वयंसेवकलिसें २४० म्ह स्वयां अप्वः मनूतय्सं ब्वति काःगु खः । वडा सामाजिक नर्स रजिना डंगोलं न्ह्याकादीगु ज्याझ्वःयात वडा कजि संजुमा महर्जनं लसकुस यानादीगु खः । वडा सदस्य पुष्परत्न प्रजापतिं उगु ज्याझ्वःया तर्कबारे जानकारी बियादीगु खः । उगु ज्याझ्वलय् वडा दुजःपिं नानीहेरा डंगाेल, श्यामकृष्ण खड्गी व मुना गहतराज रामदामया नं उपस्थिति दूगु खः ।
