पौष शुक्ल पुन्हिया दिंनिसें सक्वया शाली खुसिइ माधवनारायणया अपसं च्वनाच्वंपिंसं चाँगुनारायणया सादहखय् म्वः ल्हुयाः चाँगुनारायणया मू देगलय् माधवनारायणयात तयाः पुजा याःगु दु ।
दँय्दसं माघ शुक्ल द्वादशीया दिनय् सुथय् माधवनारायणया अपसं च्वंपिंसं सादहय् वनाः म्वः ल्हुयाः चाँगुनारायणय् माधवनारायणया खःयात तयाः पुजा यायेगु प्राचीनकालनिसेंया परम्परा दयाच्वंगु दु ।
अपसं च्वंपिंसं थौं चाँगुनारायणय् पुजा यानाः वयाः सक्वय् लिहाँ वयाः थःथःगु छेँय् वनाः कौला याइगु व्रत विधि दयाच्वंगु दु । अपसं च्वंपिंसं चाँगुनारायणं थौं सक्वः लिहाँ वयाः थःथःगु छेँय् कौला यायेधुंकाः सक्वय् भिंद्यः जात्रा यायेगु याइ । भिंद्यः जात्रा सक्वः बजाः चाःहिकेगु चलन दु । माधवनारायणया अपसं च्वंपिंसं स्वक्वःगु तीर्थयात्राया निंतिं बिहिबाः बहनिसिया १० ताः इलय् चाँगुनारायण देगः थ्यंकूगु खः ।
पौष शुक्ल पुन्हिया दिंनं निसें माघ शुक्ल पुन्हितक लच्छियंकं न्ह्याइगु माधवनारायणया अपसं च्वनीपिनिगु थ्व स्वक्वःगु तीर्थयात्रा खः । थ्वसिबें न्ह्यः पशुपति व दक्षिणकालीया शेषनारायण लिसें काभ्रेपलाञ्चोकया पनौतीइ अपसं च्वंपिंसंं तीर्थयात्रा यायेधुंकूगु दु ।
माधवनारायणया चाँगुनारायणय् जुइगु तीर्थयात्रा माघ शुक्ल एकादशीया दिं बहनि जुइगु याइ । थुकिया निंतिं अपसं च्वंपिं माघ शुक्ल एकादशीया दिं बहनि १० ताः इलय् चाँगुनारायण थ्यंकूगु श्री माधवनारायण स्वस्थानी व्रत लिसें शालीनदी सुधार समितिया नायः विकासमान सिंहं राससयात धयादिल ।
थ्व थुगुसीया लिपांगु तीर्थयात्रा नापं खः । पौष शुक्ल पुन्हि (वंगु पुस १९ गते) निसें सक्वया शालीखुसिइ म्वः ल्हुयाः माधवनारायण व श्रीस्वस्थानी परमेश्वरी देवीया पूजा यायेत भक्तजनत म्वःम्वः थ्यंकूगु दु । थ्व जात्राया हुनिं सक्व व शाली खुसि वनीगु सार्वजनिक यातायातय् भीड जुयाच्वंगु दु । मेलाया मौकाय् सार्वजनिक यातायातं अप्वः भाडा कयाच्वंगु भक्तजनतय्सं ध्याचू प्वंकूगु दु ।
सार्वजनिक बिदा व शनिबाःया दिं यक्वः भक्तजन सक्वया शाली खुसिइ थ्यंकेगु यानाच्वंगु दु । दँय्दसं पौष शुक्ल पुन्हिया दिंनं निसें माघ शुक्ल पुन्हिया दिंतक सक्वया शाली खुसिइ माधवनारायणया अपसं च्वनेगु याइ ।
शालीखुसिइ मेला न्ह्याइगु थ्व इलय् देय्या थीथी थाय्या नापनापं विदेशं नापं श्रद्धालु भक्तजनत सक्वय् वयेगु यानाच्वंगु दु ।