कांग्रेसया सभापति गगनकुमार थापां सहिदया म्हगसः पूवंकेगु व उमिसं क्यनाथकूगु लँपुइ जुइगु प्रण यायेमाःगु न्ह्यथनादीगु दु ।
सहिद दिवसया लसताय् वय्कःपिनिगु अदम्य साहस, सङ्कल्प व आदर्शयात उच्च सम्मान यानादिसें वय्कलं सहिदपिसं थःगु जिवन देय् व जनताया निंतिं पाःगुलिं हे थौं झी स्वतन्त्रताया युगय् सासः ल्हाये खनाच्वंगु धयादीगु दु ।
सभापति थापां नेपाली जनताया अधिकार व स्वतन्त्रताया निंतिं २००७ सालया जनक्रान्ति सिबें न्ह्यवंनिसें २०८२ या ‘जेनजी’ विद्रोहतक, इतिहासया थीथी कालखण्डय् जूगु फुक्क आन्दोलन व सङ्घर्षय् थःगु अमूल्य जीवन आहुति बियादीपिं सकलें वीर सहिदपिंत श्रद्धाञ्जली प्वंकादीगु दु ।
सुदृढ व सबल लोकतन्त्रपाखें जक नेपाःयात शान्त व समुन्नत राष्ट्रया कथं रूपन्तरण याये फइगु न्ह्यथनादिसें वय्कलं वीर सहिदपिंसं क्यनादीगु त्याग, बलिदान व आदर्शया लँपुयात आत्मसात् यानाः समुन्नतिया दिशाय् दृढ जुयाः न्ह्यायेगु सकसियां दायित्व जूगु धयादीगु दु ।
सभापति थापां कांग्रेसया नेतृत्वय् संविधानसभापाखें निर्मित जूगु ‘सङ्घीय लोकतान्त्रिक गणतन्त्र नेपालया संविधान’य् लिपिबद्ध जनअधिकारयात प्रभावकारी कार्यान्वयन व ई कथं परिमार्जन यायेमाः धयादीगु दु । लिसें वय्कलं स्वदेश लिसें विदेशय् च्वनादीपिं सकलें नेपाःमिया मंकाः कुतःपाखें ‘समुन्नत नेपाल, सम्मानित नेपाली’या आज्जु पूवंकेत थ्व दिवसं सकसितं हःपाः बिइगु विश्वास प्वंकादीगु दु ।