सर्वोच्च अदालतया पूर्वप्रधान न्यायाधीश कल्याण श्रेष्ठं शिल्प, भाषा व उद्यमया संरक्षण व प्रवद्र्धनपाखें नेवाः समुदायया पहिचान ल्यंके फइ धयादीगु दु ।
थौं पद्मरत्न लुमन्ती गुथिया स्वक्वःगु वार्षिक साधारणसभाया लसताय् ग्वसाः ग्वःगु ‘संविधानया छगू दशक : देय्या परिस्थिति व नेवाः समुदायया अवस्था’ विषयक अन्तरक्रियाय् श्रेष्ठं नेवाः संस्कृतियात उद्यमलिसे स्वानाः भावी पुस्तायात लःल्हाये माःगु खँ न्ह्यथनिदल ।
नेवाः समुदाय ऐतिहासिक रूपय् शिल्प व सीपया हुनिं म्हस्यूगु लुमंकुसें श्रेष्ठं लिपांगु इलय् उगु म्हसिका कमजोर जुजुं वनाच्वंगु खँय् चिन्ता प्वंकादिल । “संस्कृति वृद्धि व शिल्पं म्हसीकी, तर थौं व तना वनाच्वंगु दु । बहाल व ब्याजय् जक निर्भर जुयाः मज्यू, उद्यम व श्रमय् लिहाँ वनेमाः,” वय्कलं धयादिल । श्रेष्ठं नेवाः समुदायलिसे क्वातुगु सांस्कृतिक धरातल व अपार सीपया खानी दुगु उल्लेख यासें सहकार्यया माध्यमं स्वच्छ, प्रभावकारी व वैधानिक विकासपाखे न्ह्यज्यायेमाःगु खँय् बः बियादिल ।
“हरेक भाषाय् ज्ञान दइ, उकिं भाषा संरक्षण अनिवार्य दु,” वय्कःया धापु दु । आत्मकेन्द्रित सोच त्यागे यानाः मंकाः कुतलं जक समाज रूपान्तरण सम्भव जुइगु वय्कलं कनादिल ।
ज्याझ्वलय् गुठीया सचिव नरेशवीर शाक्यं संविधानं सम्पूर्ण भाषाभाषीयात समान अधिकारया व्यवस्था याःसां नं व्यवहारय् उकया प्रभावकारी कार्यान्वयन जुइ मफुगु धारणा प्वंकादिल । वय्कलं अधिकार व्यवहारय् लागू याकेत व म्हसिका संरक्षण यायेत नेवाः समुदाय एकताबद्ध जुइमाःगु खँय् बः बियादिल ।
ज्याझ्वलय् पद्मरत्न लुमन्ती गुथिया अध्यक्ष केशवमान शाक्यं समाज रूपान्तरणय् पद्मरत्न तुलाधरं बियादीगु योगदानयात जीवन्त यानातयेगु आज्जुं गुथिं निरन्तर सामाजिक, सांस्कृतिक व बौद्धिक गतिविधि न्ह्याकावयाच्वंगु जानकारी बियादिल ।