मांभाय् छ्यलाबुला उपसमिति श्री नाथेश्वर छुट गुथि परम्परागत वतु त्वाःया ग्वसालय् थौं छगू ज्याझ्वःया दथुइ वतु त्वाः मिसा जः शैक्षिक हने ज्याझ्वः जुल ।
येँ मनपाया उपप्रमुख सुनिता डंगोलया मूपाहाँसुइ जूगु ज्याझ्वलय् वतु त्वाःया एसईई स्वयां च्वय्या तगिं ताःलाये धुंकूपिं १०८ म्ह मय्जुपिन्त हनेज्या याःगु खः । ज्याझ्वलय् सम्मानित जुयादीपिन्त भिंतुना देछासें उपप्रमुख डंगोलं मस्तय्त मचांनिसें हे मांभासं खँल्हाबल्हा याके माःगु खँय् बः बियादिसें मस्तय्त मांभाय् मस्यन धाःसा कन्हय् मचा तःधिकः जुइधुंकाः मांअबुं हे थःत भाय् मस्यंगु धकाः द्वपं बीगु जूगुलिं मस्तय्त मांभायु स्यनेगु भाला मांअबुया हे जूगु खँ कनादिल । मस्तय्सं नेवाः भासं खँ ल्हाइबलय् मिले मजूसा भिंकाः थथे धायेगु धकाः स्यना बीमाःगु नं वय्कलं धयादिल ।
नेवाः न्ह्यलुवा मल्ल के. सुन्दर विशेष पाहाँकथं झायादीगु ज्याझ्वलय् वय्कलं नेवाः भाय्या महत्व व नेवाः इतिहासया खँ कनादीगु खः । शैक्षिक हना ज्याय् सम्मानित जुयादीपिंत भिंतुना देछासें न्ह्यलुवा मल्लं मांअबुपिसं हिचःति हायेकाः थःमस्तय् भविष्य बांलायेमा धकाः आखः ब्वंकीगु तर मस्त +२ पास जुइवं हे विदेशय् वनाः आखः ब्वं वनेत स्वइगु अले अनं लिहाँ मवइगु प्रवृत्तिं यानाः नेपाःयात यक्व नोक्सान जुयाच्वंगु खँ तयादिल ।
गुथिया नायः शान्तराज शाक्यया सभापतित्वय् न्ह्याःगु ज्याझ्वलय् गुथिया न्वकु पन्नारत्न महर्जनं मांभाय् संरक्षणया निंतिं वतु त्वालं न्ह्याकावयाच्वंगु गतिविधिया बारे जानकारी बियादीगु खः ।
गुथिया छ्याञ्जे दीपक महर्जनं न्ह्याकूगु ज्याझ्वलय् त्वाः थाकुलि रामबहादुर (माइला) महर्जन, येँ मनपा २२ वडाया नायः चिनिकाजी महर्जन, ज्यापु महागुथि नेपाः येँ महानगर समितिया नायः पञ्चनारायण महर्जन, अधिवक्ता रमेश महर्जनलिसेंया व्यक्तित्वपिनि ब्वति दुगु खः ।
उगु हे ज्याझ्वलय् त्वाः न्वकू आशानारायण महर्जन मदुगुया बिचाः हायेकूगु खः । न्वकू महर्जन मदुगु थौं झिंनुन्हु दुगु त्वाः खलकं जानकारी ब्यूगु दु ।
