श्री हल्चोक आकाश भैरव देगः लागाय् दयेकूगु सांस्कृतिक भजन छेँया थौं छगू ज्याझ्वःया दथुइ उलेज्या जूगु दु ।
बागमति प्रदेश सभाया दुजःलिसें पूर्वमन्त्री प्रकाश श्रेष्ठया मूपाहाँसुइ जूगु ज्याझ्वलय् उगु छेँ धस्वाकेत ग्वाहालि यानादीगुलिं येँ महानगरपालिकाया पूर्वमेयर विद्यासुन्दर शाक्य, नागार्जुन नगरपालिकाया कार्यवाहक प्रमुख सुशिला अधिकारी, प्रमुख प्रशासकीय अधिकृत गणेशप्रसाद अर्याल व नागार्जुन नपा ३ वडाया नायः उमेश लामायात विशेष सम्मान याःगु खः ।
थुकथं हे सांस्कृतिक भवन निर्माण ज्या यानादीम्ह सुधीर चन्द्र झायालिसें हल्चोक आकाश भैरव गुठीया थीथी ज्याझ्वःत न्ह्याकेगु निंतिं ग्वाहालि यानावयाच्वनादीम्ह पवन स्थापित व सुर संसार मिडियाया नायःलिसें न्हाय्कं डटकमया प्रधान सम्पादक सुनिता महर्जनयात नं हनेज्या याःगु खः ।
ज्याझ्वलय् नुगःखँ तयादिसें मूपाहाँ प्रकाश श्रेष्ठं बागमती प्रदेशया १२ लाख तका बजेटं सुरु जूगु ज्या क्वचायेकेत येँ महानगरपालिकापाखें १ करोड ३ लाख स्वयां अप्वः ध्यबा ग्वाहालि यानाः छेँ धस्वाःगु खँ कनादिल । वय्कलं थुगु भवनय् इचंगु नारायणयापिं वयाः तक भजन याः वइगु व कार्तिक लच्छि भजन जुइगु खँ नं कुलादिल ।
ज्याझ्वलय् नुगःखँ तयादिसें येँ मनपाया पूर्वमेयर विद्यासुन्दर शाक्यं थः येँ मनपाया नायः जूगु इलय् महानगरपालिका जक बांलाना मगाः थः जःखःया नगरपालिका नं बांलात धाःसा जक थःपिं नं बांलाइ धइगु तायेकाः दँय् ३० करोड तक जःलाखःला नगरपालिकायात ग्वाहालि यायेगु ज्याझ्वः तयागु व वहे ज्याझ्वःकथं थुगु सांस्कृतिक भवन निर्माणया ज्या जूगु खँ कनादिल । वय्कलं थःपिसं येँयाःया इलय् थीथी देय्या मेयरलिसेंया डेलिगेट्सतय्त सःतागु इलय् म्वाःमदुगु खर्च याःगु धइगु द्वपं वःगु तर व खर्च मखुसें लगानी जूगु खँ कनादिल । व लगानीया प्रतिफल कथं हे चीनपाखें लगभग ८ करोडया ग्वाहालि येँ मनपायात चूलाःगु खँ कनादिल ।
ज्याझ्वलय् नुगःखँ तयादिसें नागार्जुन नगरपालिकाया कार्यवाहक प्रमुख सुशिला अधिकारीं नागार्जुन नगरपालिका ३ वडा सांस्कृतिक सम्पदां युक्त थाय् जूगु व थनया विकाशया निंतिं थःपिसं येँ महानगरपालिकालिसे सहकार्य यानाः ज्या याये खंगु लसताया खँ जूगु कनादिल । वय्कलं नागार्जुन नगरपालिकाय् थःपिं वयागु इलय् स्वयां यक्व भौतिक पूर्वाधार निर्माण यायेगु ज्या जूगु व सीमित श्रोतया हुनिं जनताया अपेक्षाकथं ज्या न्ह्याके मफयाच्वंगु खँ कनादिल ।
हल्चोक आकाश भैरवनाथ गुठीया नायःपिं शेर बहादुर पुतुवार व अर्जुन पुतुवारया मंकाः नायःसुइ न्ह्याःगु ज्याझ्वलय् हलिं नेवाः दबूया केन्द्रीय उपाध्यक्ष सुरेन्द्रभक्त श्रेष्ठ, नेवाः पत्रकार राष्ट्रिय दबूया नायः नृपेन्द्रलाल श्रेष्ठलिसें स्थानीय खलःपुचःया नायःपिनि ब्वति दुगु खः ।