तेक्वान्दो ग्राण्डमास्टर दिवाकर महर्जनया प्रस्तुति व अभिनय दुगु ‘ज्यापु दाई’ बोलया म्ये व म्यूजिक भिडियो सार्वजनिक जूगु दु । म्ये संकिपाय् ज्ञान बहादुर व रुक्साना महर्जनया नं अभिनय दु ।
आइतबाः बहनी यलया यलमुल गार्डेनय् जूगु ज्याझ्वलय् नेपालभाषाया म्ये व म्यूजिक भिडियो सार्वजनिक याःगु खः ।
थुगु म्येय् निशा देसारया सः दु । चण्डेश्वर महर्जनया रचना दुगु म्येय् जुगल डंगोलया संगीत व संगीत संयोजन दु ।
रामकृष्ण खड्गीं निर्देशन यानादीगु थुगु म्येया म्यूजिक भिडियो छायांकन रकी महर्जनं यानादीगु खः ।
थःगु कला व संस्कृतिप्रति नुगः क्वसाःम्ह ज्यापु समुदायया छम्ह व्यक्तिं कासाया माध्यमं अमेरिका थ्यंकाः अन तेक्वान्दो कासामि उत्पादन यानाच्वंगु बाखं भिडियोय् कनातःगु दु ।
म्ये संकिपाय् नेवाः संस्कार, नखःचखः, जात्रापर्वलिसें नेवाः भ्वय्यात न्ह्यब्वयातःगु दु । नेवाः लोक धुनत दुथ्याकाः दय्कातःगु म्ये संकिपा निर्माण व म्ये हालाबलय्या अनुभव न्यंकुसें म्ये हालामि निशा देसारं थुगु पुचःलिसे ज्या यानाबलय् तसकं न्ह्यइपुसेच्वंगु खँ कनादिल ।
