ज्यापु महागुथि नेपाःया एकीकरण लिपाया निक्वःगु दँमुँज्या थौं यलया थेच्वय् तःजिक हनेज्या जुल ।
सुथय् सांस्कृतिक र्यालीं थेच्वया च्वय्लाछि क्वय्लाछि चाःहिलाः न्ह्याःगु दँमुँज्याया उलेज्याय् पूर्वमन्त्रीलिसें प्रदेश सांसद प्रेमभक्त महर्जन, प्रदेश सांसद रघुनाथ महर्जन, गोदावरी नगरपालिकाया मेयर गजेन्द्र महर्जन, उपमेयर मुना अधिकारी, महालक्ष्मी नगरपालिकाया उपमेयर लक्ष्मी महर्जनपिं विशेष पाहाँकथं झायादीगु खः ।
महागुथिया संरक्षक लोककवि राजभाइ जकःमि, सन्तु महर्जन व ज्ञानकुमार महर्जनया विशेष उपस्थिति दुगु ज्याझ्वः महागुथिया नायः सत्यनारायण डंगोलया सभापतित्वय् जूगु खः ।
ज्याझ्वलय् लोककवि राजभाइ जकःमि, विश्वकीर्तिमानी सगरमाथा आरोही कल्पना महर्जन, कासामि स्वयम्भुराज डंगोल व संस्कृतिकःमि रमेशमान मुनिकारयात विशेष हनेज्या याःगु खः ।
ज्याझ्वलय् पाहाँपिसं भिंतुना न्वचु तयादिसें ज्यापु महागुथियात अझ सशक्त दयेका यंकेमाःगु, ज्यापु महागुथि व ज्यापु समाजया दथुइ नं एकता जुयाः ज्यापुतय् छगू हे संस्था जुइमाःगु, ज्यापुत राजनीतिक रुपं नं न्ह्यज्यायेमाःगु खँ कुलादीगु खः ।
महागुथिया छ्याञ्जे सानु महर्जनं न्ह्याकूगु ज्याझ्वलय् वरिष्ठ न्वकू ज्ञानेन्द्र महर्जनं लसकुस यानादीगु खःसा निम्हम्ह न्वकू सरिता महर्जनं सुभाय् देछानादीगु खः ।
