येँय् वइगु जेठय् जुइगु ‘निक्वःगु मिस्टर महानगर शारीरिक सुगठन धेंधेंबल्ला’ या तयारी सुरु जूगु दु । येँ महानगरपालिका–२२ या ग्वसालय् जेठ २९ व ३० गते जुइगु उगु धेंधेंबल्लाया तयारी सुरु जूगु वंगु शनिवाः ग्वसाः ग्वःगु पत्रकार सम्मेलनय् जानकारी बिउगु दु । धेंधेंबल्लाय् मिजंपाखें खुगू तौल पुचलय् धेंधेंबल्ला जुइगु नेपाल शारीरिक सुगठन व फिटनेश महासङ्घया वरिष्ठ न्वकू विजयलाल कायस्थं जानकारी बियादिल ।
स्पोर्टस फिजिक्सपाखे १७० सेमी स्वयां च्वय् लिसें उगु पुचःतक निगू विधाय् प्रतियोगीत दथुइ धेंधेंबल्ला जुइ । धेंधेंबल्लाय् थुगुसी मिसापाखे स्पोर्ट फिजिक्स अन्तर्गत खुला प्रतिस्पर्धा जुइगु कायस्थं कनादिल । धेंधेंबल्लाया मू नारा ‘व्यायाम याये, स्वास्थ्य जुइ ः स्वास्थ्यया निंतिं व्यायाम’ धइगु क्वःछ्यूगु खः । फुक्क तौल पुचःया विजेतां फुक्क प्रतिस्पर्धाय् म्हिते दइगु व्यवस्था यानागु खँ नं पुलांम्ह अतिरिक्त महानिरीक्षक तकं जुयादीधुंकूम्ह न्वकू कायस्थं कनादिल ।
फुक्क प्रतिस्पर्धाया विजेतापिंत ‘निक्वःगु मिस्टर महानगर उपाधि’लिसें ५ लाख दां, ट्रफि व ब्यानेट लःल्हाइ । धेंधेंबल्लाय् येँ महानगरपालिका दुने बसोबास यानाच्वंपिं नागरिकतय्त जक दुथ्याकीगु धाःगु खः। फुक्क कासा पुचःपाखें न्हाप, ल्यू, लियांल्यू, प्यगूगु व न्यागूगु थासय् लाःपिं कासामिपिंत पदकलिसें छसिं कथं १ लाख, ५० हजार, २५ हजार, १५ हजार व १० हजार नगद सिरपा लःल्हाइ ।
अथे हे, स्पोर्ट फिजिक्सपाखे मिजं व मिसा निगुलिं विधाय् न्हापांनिसें न्यागूगु थासय् लाःपिंत प्रतियोगीतय्त छसिंलाक्क १ लाख २५ हजार, ७५ हजार, ५० हजार, २५ हजार व १० हजार दां पुरस्कार कथं लःल्हाइगु खँ वडा नायः चिनिकाजी महर्जनं जानकारी बियादिल ।
थ्यंमथ्यं निसःगू क्लबपाखें छनौट जुयाः वइगु १०० म्ह कासामित दथुइ धेंधेंबल्ला जुइगु महासङ्घया नायः राजेशबाबु श्रेष्ठं जानकारी बियादिल ।
