यलया छगू सांस्कृतिक थाय् इखाछेँया प्रचार व प्रवद्र्धनया तातुनां थ्व हे मंसिर १८ निसें २० गतेतक स्वन्हुयंकं इखाछेँ कल्चरल फेष्ट ज्याझ्वः याइगु जूगु दु ।
इखाछेँ टोल समितिपाखें थौं छगू पत्रकार सम्मेलन ग्वसाःग्वसें थुगु ज्याझ्वःया जानकारी ब्यूगु खः । इखाछेँया इतिहास, अनया सांस्कृतिक सम्पदा व स्थानीय परम्परा, कला, संगीत व नसाज्वलं न्ह्यब्वइगु जूगु दु ।
थुगु ज्याझ्वलय् झिद्वः मनूतय्सं ब्वति काइगु अनुमान ग्वसाःखलकं याःगु दुसा ज्याझ्वलय् थीथी नेवाः सांस्कृतिक हुलाप्याखंयालिसें वाद्य शिरोमणी संगीत घराना, पासापिं, यल रिदम, द जेनिथ ब्याण्ड, इतिश्री, युगअन्त्य, पर्पल भेल्भेट व एनएस ११३४ पाखें लाइभ ब्याण्ड न्ह्यब्वइगु ज्याझ्वः दु ।
पत्रकार सम्मेलनय् ज्याझ्वःया जानकारी बिसें इखाछेँ टोल समितिया नायः सानुराज बज्राचार्यं इखाछेँ छगू त्वाः जक मखसें छगू लागा खयां नं थौं सीमित रुपय् लिकुना वंगु व छगू हे त्वालय् न्यागू बिहार दुगु सम्पदाया तःमिगु, तग्वःजाकि चिग्वः जाकि, आल्को हिति, यँयाःबलय् बौद्ध किपा ब्वज्या याइगु थुज्वःगु महत्वपूर्ण सम्पदा दुगु थाय् जुयाः नं लिउने लानाच्वंगुलिं थुकियात म्हसीके बीगु निंतिं महोत्सव ग्वसाः ग्वयागु जानकारी बियादिल ।
कृत्यकला प्रा.लि.या व्यवस्थापनय् न्ह्याकेत्यंगु थुगु महोत्सव ताःलाकेगु निंतिं ३० गू थीथी नसा ज्वलं व स्थानीय उत्पादनया स्टल दइगु अले सुुरक्षाया निंतिं १५० म्ह स्वयम्सेवक परिचालन जुइगु जानकारी पत्रकार सम्मेलनय् ब्यूगु खः ।
