२२ क्वःगु ज्यापु दिवस तःजिक हनेगु निंतिं थ्व हे मंसिर १५ गते जुइगु सुकुन्दा र्याली व ज्यापु दिवसया ज्याझ्वः झःझः धायेकेगु निंतिं थाैं सहलह मुँज्या जूगु दु ।
ज्यापु महागुथि नेपाः येँ महानगर समितिया ग्वसालय् जूगु मिसा भेला ज्याझ्वलय् दिवसया महत्व व सुकुन्दा र्यालीयात कयाः सहलह जूगु खः ।
ज्यापु दिवसया लसताय् ज्यापु महागुथि नेपाः येँ महानगर समिति व नरः काेताः त्वाःया मंकाः ग्वसालय् सुकुन्दा र्याली ज्याझ्वः न्ह्याकेत्यंगु खः ।
येँ मनसया नायः पञ्चनारायण महर्जनया सभापतित्वय् जूगु ज्याझ्वलय् २२ क्वःगु ज्यापु दिवसया कजिलिसें नरः काेताः त्वाःया नायः कृष्ण बहादुर महर्जनं ज्यापु दिवसया लसताय् न्ह्यानाच्वंगु ज्याझ्वः व जुइगु ज्याझ्वःया बारे जानकारी बियादीगु खः ।
ज्याझ्वलय् ज्यापु संस्कृति विकास काेषया नायः मंगलकृष्ण सिंह, ज्यापु महागुथि येँ मनसा न्वकू नानीहेरा महर्जनलिसें महागुथिया पदाधिकारीपिनि ब्वति दुगु खःसा येँया ६३ त्वाःया मिसा पुचःया जःपिनि न्ह्यथनेबहःगु ब्वति दुगु खः ।