मार्गशीर्ष कृष्ण चतुर्दशीया दिं थौं पितृमोक्षया मनंतुना पाशुपत क्षेत्र (पशुपति लागा)य् शतबीज ह्वःगु दु । बालाचःह्रेनापं धाइगु थौंया दिं विधिकथं नेपाःमितय् आराध्य द्यः पशुपति महाद्यःया पशुपति लागाय् च्वंगु मृगस्थलीलिसेंया थासय् शतबीज ह्वःसाः मदुपिं पितृयात मोक्ष दइगु जनविश्वास दु । ‘चर्तुवर्ग–चिन्तामणि’ कथं सच्छिगः वा ह्वलेगु विधि जूसां गुलिसिनं कःनि, छ्व, हलु, तछ्व लिसेंया थीथी बीबः शतबीजया कथं ह्वलेगु यानाच्वंगु दु । मार्गशीर्ष कृष्ण त्रयोदशीया बहनी मदुपिं पितृया सद्गतिया कामना यानाः महादीप दान यानाः शतबीज ह्वलाः जक नयेमाःगु धापू दु । पशुपति लागाया मृगस्थली, विश्वरुप, आर्यघाट, रुद्रगाडेश्वर, किरातेश्वर, गौरीघाट, गुह्येश्वरी, नवबुद्ध, ख्वाँय् गणेद्यः लिसेंया थासय् शतबीज ह्वःपिं म्वःम्वः मनूत दूगु खः । थौं पशुपति लागाय् वइपिंसं वासुकी व गुह्येश्वरीइ नापं विशेष पुजा याइ । पाशुपत लागाया नापनापं स्वनिगःया गोकर्णेश्वर, डोलेश्वर, मखनय् च्वंम्ह महाद्यः लिसें देय्न्यंकंया थीथी थासय् नापं शतबीज ह्वःगु खः ।
By सुनिता महर्जन
वि.सं. २०६० सालय् मेट्राे एफएमय् सांस्कृतिक मण्डल ज्याझ्वः न्ह्याकाः औपचारिक रूपं सञ्चार ख्यलय् न्ह्यज्यानादीम्ह सुनिता महर्जनजु थ्वयां न्ह्यः नं सन्ध्याटाइम्स न्हिपतिइ इलय्ब्यलय् फिचर राइटिङ यानावयाच्वनादीम्ह खः । सांस्कृतिक मण्डल ज्याझ्वःया निंतिं समाचार संकलन, कार्यक्रम प्रस्ताेता व निर्माणया ज्या यानादीम्ह वय्कलं इलय्ब्यलय् अप्सरा वाःपाै, तिकिझ्याः वाःपाैलिसेंया नेपालभाषाया पत्रिकाय् च्वसु प्रकाशित यानादीगु दु । लिपांगु इलय् मेराे साप्ताहिक पत्रिकाय् प्रमुख संवाददाताकथं ज्या यानाच्वनादीगु दु । नेवाः संचार ख्यलय् मिसातय् उपस्थितियात सशक्त दय्के माः धइगु तातुनां वय्कःया हे पहलय् न्हाय्कं डटकम न्ह्याकादीगु दु । वय्कः थाैंकन्हय् नेवाः पत्रकार राष्ट्रिय दबूया केन्द्रीय ल्यूछ्याञ्जे जुयादी सा आदिवासी जनजाति पत्रकार महासंघ (फोनिज)या नं केन्द्रीय दुजः जुयादी ।