जनकवी दुर्गालाल श्रेष्ठया खुगू सफूया म्यूजिक भिडियो नापं वय्कलं संगीत तयादीगु ‘जिगु गर्व’ म्ये शुक्रवाः सार्वजनिक जूगु दु । येँ महानगरया उपमेयर सुनिता डंगोलं शुक्रवाः श्रेष्ठया कृति कपूया कुँ, नःलिगु नुगः खँ, छुछुं गिजिमिजि ध्वः, कावा, कविया बाखं कविया भासं व अन्तर्भाव थूयाया लोकार्पण यानादिगु खः । अथे हे विश्व वज्राचार्यं निर्देशन यानादीगु जिगु गर्व या म्यूजिक भिडियो नं सार्वजनिक याःगु खः ।
दुर्गालाल साहित्य प्रतिष्ठानया ग्वसालय् जूगु उगु ज्याझ्वलय् नेपाल भाषा एकेडेमिया चान्सलर मल्ल के सुन्दरं भाषा आयोगया दुजः, पत्रकार व साहित्यकार सुरेशकिरण मानन्धरलिसेया अन्तक्र्रियाय् जनकवी दुर्गालाल च्वयेगु शैली लगायत वय्कःया जीवनया थीथी पक्षयात कयाः चर्चा यानादीगु खः ।
८९ दँ दुम्ह दुर्गालालं २००६ सालय् जूगु विद्यार्थी साहित्य परिषद् सम्मेलनय् कविता वाचन यानाः दुर्गालालया साहित्यिक यात्रा न्ह्याःगु जानकारी बियादीगु खः । अथे हे वय्कलं दुर्गालाल नेपालभाषाया सेवक जुया न्ह्याबलें गर्व यानादीम्ह व्यक्ति खः धकाः धयादिसें गीतकार, नाटककार व अनुवादकया रुपय् नं उलि हे कुशल सर्जक खः धयादिल । लिसें वय्कलं ५० दँ न्ह्यः व वयां लिपा दुर्गालालया मनोवृत्तिइ वःगु हिउपाः व वय्कःया साहित्यिक यात्राय् वःगु परिपक्वताया बारे नं कनादिल । मल्लं धयादी, ूदुर्गालाल तपस्या यानाः साहित्यय् थःत परिपूर्ण यानादीम्ह व्यक्ति खः । दुर्गालालया काव्यात्मक मनोवृत्तिइ न्हापा न्हापा राग, क्रोध व तीक्ष्णता दुथ्याः । लिपा राजनीतिक रुपं सचेत जुइधुंकाः समानताया भावना, वामपन्थी व समाजय् विभेदया भावना विरुद्ध वयागु विद्रोह व वयागु ज्याय् विद्रोह मजूगु खः ।