च्वापुकाःगु मतिना

नाति काजी महर्जन
गुंलाया झ्वलय् स्वयम्भुया बातनय् द्यकी वःम्ह मय्जुनाप थिथि ख्वाः ल्वायेवं केलेहेँ मिखांं स्वल वं । उघ्रिमय् माकःचां ग्वःगु जालय् की तक्यं थें मोहनिया तारणय् जि तक्यन । उलिमछि हुलय्, जिं सुं हे मखन । बस् वहे जक अतिकं बांलाः ताल । हुलं घ्वातुमतु घ्वातं नं थां थें जिगु पलाः उखेथुखे मसन । झुमिं यंम्ह थें जिं मिखा फुति तकं मयासे वैत तोलय् जुयाः स्वयाच्वन । भचा लिपा झसंग वनाः होसय् वल । मिखा छकः गिलिगिलि यानाबलय् इतःमतः कनाः हसंमसं धाःथें जुल । व ला च्वय् थ्यंकः वने धुंकल खनि । म्हस्यू नं तास्यू छाय् जिं वैत स्वयेलात धकाः थःथम्हं अजू चाल । न खँल्हाबल्हा दुम्ह न नां स्यूम्ह खः । मनय् खँ वायेकाः पलख वाताहां जुल ।
ब्वाँय्ब्वाय् स्येंस्यें वयेक थहां वना हानः छकः नापलाकः वना । गनंगनं अगःचाः मालां देगःचा लू धाः थें पलख लिपा, वया पासाम्हेस्यां वैगु नां कयाः रश्मी ! धकाः सःतेवं, जिं सिल वैगु नां रश्मी धकाः । वैगु नां जक न्यनेवं म्हुतुई जायेक ई रस बुलल लुल । घुतुक्क छकः ई घुतु वन । सवाः काकां न्हिनय् हे म्हगस खन जिं  ।
बेहोशय् ‘रश्मी….!’ धकाः जिं काचाक्क सःते नं लात । वं तम्वं तम्वं बेक्वः मिखां भ्वाँय्क स्वल । सखे म्हुतु बेक्वयेकाः ल्हातं पातुपालाः वन । देके वःपिं म्वःम्वः मनूत सकस्यां भ्वाँय्भ्वाँय् स्वःगु खनाः जिगु ख्वाः जिल्ल जुयाः ह्याउँसे च्वन । द्यःचाहिले सिधयेवं तप्यंक छेँय् लिहाँ वया । छेँय् थ्यंसां जिगु मन मच्वं, धौबजि वाः थें ल्वाकःबकः वाला च्वन । न्ह्यलय् जलय् वहे जक लू मिखाय् दं वैच्वन । ब्वला सायेगु मनं न्हीन्ही देके वना । ग्वःन्हु तक ला नाप मलाः ।
अचानक वहे रश्मिचा छवाःति लिपाः हाकनं च्वय् द्यःचाःहिले थाय् ध्वदुक नापलात । मुसुमुसु न्हिलाः वं तुं हाई धाधां नतू वल । खँल्हाबल्हा यायां उखुन्हुया खँ न्ह्यथंनेवं वैत नं जितः थे हे मनय् खँ ल्हाःगु धकाः घुं कयाः खँत कन । सुनां खनि भनं लिमलाः पहलं लिपा नाप लायेगु त्वह चिनाः जिगु मोबाइल नम्बर नं काल ।
लिपा शनिवाः कुन्हु फोन वल । खँया झ्वलय् छत्थुं ल्हुतिया बाइसधाराय् नाप लायेगु क्वःछित । जि वनाः बालाजु पार्कया लुखा पिने पियाच्वना । घउबाघउ लिपा मुसुमुसु न्हिलाः व तुप्लुक्क थ्यंकः वल । टिकसया मू पूला निम्हं दुने वना क्यवय् चाःहिह्यु्ं पुखु च्वस्सं च्वंगु जंगलय् थहाँ वना । छगू सिमा कापिचाय् सुनां मखंगु थासय् निम्हं फ्यतुना ।
न्हापालाक निम्हसियां निम्हेसिगुं खँ थ्वकेगु व भचाभचा थःथःगु आगं प्वलेगु ज्या जुल । थथे जिनाप चाःहिलेत छाय् मन जूगु खः रश्मी धकाः न्ह्यसः तयेवं वं थःगु खँ मदिक तल ।
रमेश दाई,
वास्तवय् नचा इलय् हे जि कलेजया तेकेन्द्र धैम्ह छम्ह पासा नापं मतिना जूगु ख । वहे मतिनाया झ्वलय् जिपिं यक्व चाःहिलाः ख्याः नं याना । थथेहे छन्हु खँल्हांल्हां दसिया लागि छगू भ्वं च्वया हे तयेमाः धैगु खँय् निम्हं थ्यन । छाय्धाःसा कन्हय् थीथीकथंया हाथ्यात वयेफु । पंगः दं वयेफु । थज्यागु चीका छ्वयेत नं दसिपौ मदय्क मगाः धैगु खँ तल । थ्व खँय् सहमति क्वःजीवं जिपिं उखुन्हु भचा लिबाक कलेजय् च्वना । अन च्वनाः मतिनाया पलिस्था व मतिनाया दसि च्वय्त जिं ब्याग चायेका कापि लःल्हाना । वं नं थःगु म्हिचांं कलम लिकया पुसा चायेकल । उघ्रिमय् दाग मदुगु यचुगु ध्वः दुगु सादा पानाय् मतिनाया बाखं (दसि) च्वयेत जिं हे मिखा भाय् यानाः उजं बीया । वंं छसिकथं बुलुहुं ंसररर च्वयाः यंकल । मिले जू मजू, पलख लिपा जिं ब्वब्वं वना, कविता थें छन्द मिले ज्वीक भाव वयेक । पाना जायेक बाखं च्वःसां हथासं हथासं च्वःगु जुया भत्चा मगामचा ताल  । सखे त्यानुसे च्वंगु जुयाः च्वयेगु पलख दिकाः झासु लन । हाकन च्वय्त उजं बीवं वं मसि मफूतले च्वल । वास्तवय् म्हगसय् थें लकस ब्वलनाः निम्हसिया मनया इच्छा उकुन्हु पूवंका ।
थथे आखं व्बंब्वं मतिनाया झ्वलय् वया छेँपाखें ब्याहा यायेगु खँ जुल । बस जिं दछि निदँ आखः ब्वने सिधयेका जक ब्याहा यायेत खँ तयाः लिछ्यायेगु प्रस्ताव तयागु इलय् जितः हे मसिक जवर्जस्ति वयात वया मांबौनं मेम्ह मिसा नापं इहिपा याना बिल । व मिज तेकेन्दं्र अनं लिपा जितः वास्ता नं मयात । जिगु जिवनय् तःभुखाय् ब्वल । खुसिं चुइकाः चातुवाःम्ह न सी फु, न म्वाय् फुम्ह जि जुल । कलेजय् नं पासापिंसं नागःतुगः याइगु ला जु हे जुल । व मिजं पासानाप नतुसुतु मन्त । छन्हु दसि फुक्क झ्यार्रझुर्र खुनाः सुनां मखंक खुसी चुइका छ्वया । अनलिपा जिं थःगु भविष्य व जिवनया लँपु हिलेगु तातुना । जिं थः म्वात्तले थःगु इच्छा आकांक्षायात क्वत्यला मतयेगु व स्वतन्त्ररुपं जीवन हनेगु क्वःछिना । अनलि वस थथे हे छम्ह छम्ह नाप लानाः ई छ््रयाना वयाच्वना ।
वैगु खँ न्यनाः जिगु मनय् न्हापां तःभुखाय् ब्वल । भतिभति माया वं थें जुल ।
ख्वाः स्वय् बांलाःम्ह व कामवती मिसाया चाल जिं थुइके मफुत । खँयाखय् वं अझ सुं मदुगु अनकन्तार थासय् ब्वना यंकल । सिमा भच्चा झ्याम्म च्वंथाय् इल्क्वंदाःगु सिच्चुगु पाख्चाय् निम्हं फ्यतुना । व थासं क्वय् च्वंगु न्यापुखु खनेदु । वं व पुखु क्यनाः न्यन छं अन न्या लाल कया च्वंगु खं ला ?
मखं धकाः धया ।
उली धायेवं जिगु ख्वा स्वयाः व न्हिल ।
न्या लखय् लाल काये मखन कि छु जुइ स्यूला ? धका हाकन न्यन ।
फाताफाता पुलाः सी धकाः धया ।
उलि धायेवं वं ख ला ? धकाः न्याकुं पह क्यनाः मछा मजुसे न्याया जाः वांछ्र्र्वत व पुखुलि मखसे जितः धकाः क्यंकल । विवशताय् जि अन लिचिले मफुत जालय् क्यंका जित चुप्पा चुप्पा नया वं थःगु इच्छा पूवंकल, अनायास निम्हं पाखाचां फिइ मफयेक ग्वाराग्वारा तुला क्वय्पाखे कुतुं वन । छझा बेहोस थेंं जुल । होस वःगु बखतय् सिल बनपाले चाह्यू वःगु पाः लाना च्वन । व बनपालें जिमित खंसां मखंपहः याना च्वंगु जुल । निम्ह अनं दनाः वसतय् क्यूगु धु थाथा यानाः पिने वयाछ्र्वया । छगू रेष्टुरांलय् वनाः नयेनी याना । लिपाः हाकनं नापलाय् कथं व थःगु लँय् वन । जि थःगु छेँय् लिहां वया ।
तर छुं दिं लिपा जिगु म्हय् उलिउलि चासु चासु धया वल । झझं सह याये मफयेक चासुया वल । इलिइलिं ज्वर नं वल । वहे रानीवनया डोंम्वलं पुनापाना हल ला धकाः क्यनाः धाःधाःगु याना बिया । अय्नं मज्यू । डाक्टर क्यं वना फुक्क चेकअप याना । लिपा हिया चेकअप जुल । निन्हुलिपा रिपोर्ट कायेत वा धाल । रिपोर्ट का वना । सुं नाप इलुइलु जूगु दुला ? धका डाक्टरं जितः न्यन, जूगु मदु धकाः छं्य संका । तर डाक्टरं पत्याः मयाः । नतिजा अजू ! न्हूगु ल्वय् हि बांमलाः धाल । व धैगु छु धकाः न्यना । अंग्रेजी ंथुकियात एचआइभि पोजितिभ धकाः धाइ धाल । अनथाय्लाक्क जि छथुं सिमां कुतुंवःम्ह माकः थें प्याग्लापुग्लु वन । जि अन हे बेहोश जुयाः ग्वातुल । भचा लिपा डाक्टरं छुछुयात मस्यु जि होसय् वल । वासः बी धन्दा कायम्वाः धकाः धाल । धैर्य यानाः छेँ लिहाँ वया । वास माक्व आः याना च्वनागु दु । अय्नं जिगु म्वायेगु दिं धाःसा निश्चित मजुल । व मिसानाप जिगु च्वापुकाःगु मतिनाया फल तत्काल हे जित दत । आः मेगु छु मालं ।