“नारायण परिवार क्लबया पूर्व अध्यक्ष निर शाक्यजुं धयादी थें येँया भूमिगत लःया स्तर (Groundwater Level) म्हाे जुजुं वनाच्वंगु दु । थुकिं तःधंगु समस्या हयेफु । अथेजुयाः समाजसेवाया ख्यलय् न्ह्यज्यानाच्वंगु नारायण परिवार क्लबं आः भूमिगत लःया स्तर थकायेगु निंतिं वाति लः मुंकेगु (Rain Water Harvesting) या ज्याय् जनचेतना थनेगु ज्या न्ह्याकेमाः ।”
थ्व धापू उपप्रधानलिसें शहरी विकास मन्त्री प्रकाशमान सिंहं नारायण परिवार क्लबया लुँबुदिं हना ज्याझ्वःयात सम्बाेधन यासें धयादीगु खः । स्वनिगलय् भूमिगत लःया स्तर धमाधम कुहाँ वनाच्वंगु व भुमिगत लःया पुनःभरण मयात धाःसा २०३२ सालय् ह्यूमत भासय् जू थें ज्वःगु समस्या हाकनं नं वयेफुगु क्लबया पूर्व अध्यक्ष लिसें जलश्राेतविज्ञ निर शाक्यं थःगु सम्बाेधनया झ्वलय् कनादीगु खः । थ्व हे खँया सम्बाेधन यासें उपप्रधानमन्त्री सिंहं आः भूमिगत लः पुनःभरणया निंतिं वाति लः मुंकेगु अभियान न्ह्याके माःगु व थुकिया निंतिं स्थानीय व प्रदेश सरकारलिसे जानाः ज्या यायेत वय्कलं सुझाव बियादीगु खः ।
वय्कलं नारायण परिवार क्लबं पञ्चायती शासन व्यवस्थाया इलंनिसें हे थनया ल्याय्म्हतय्त जागरूक दयेकाः सामाजिक सेवाया ख्यलय् न्ह्यज्याकाः सामाजिक सेवाया ज्यायालिसें स्वास्थ्यसेवा, शिक्षा ख्यः, कासा व सञ्चार ख्यलय् न्ह्याकूगु पलाःया सराहना यानादिसें ५० दँतक निरन्तर ज्या न्ह्याकेगु अःपु मजूगु तर येँया नेवाःत लगे जुल कि थःपिसं न्ह्याकूगु ज्या निरन्तर न्ह्याका हे च्वनी धइगु दसु क्लब जूगु खँ तयादिल ।
ज्याझ्वलय् विशेष पाहाँकथं झायादीम्ह संघीय सांसदलिसें पूर्वमन्त्री कृष्णगाेपाल श्रेष्ठं येँ क्षेत्र नं. ९ स लाःगु उत्कृष्ट सामाजिक सेवा याइगु क्लबत मध्ये नारायण परिवार क्लब नं छगू जूगु धयादिसें वय्कलं थुगु क्लबयात च्वन्ह्याकेगु निंतिं स्व. चक्रमान डंगाेल व पूर्वमन्त्री स्व. तीर्थराम डंगाेलया याेगदानयात नं लुमंकादिल । वय्कलं स्व. चक्रमान डंगाेल च्यागू कार्यकाल क्लबया नायः जुयादीगु इलय् सामाजिक ज्याखँय् क्लब तसकं च्वन्ह्याःगु खँ न्ह्यथनादिसें क्लबया हरेक ज्याखँय् स्व. तीर्थराम डंगाेलया नं उलि हे ग्वाहालि दुगु व थःत नं क्लबलिसे स्वापू स्व. तीर्थराम डंगाेलं हे दयेकाब्यूगु खँ न्ह्यथनादिल ।
थुकथं हे ज्याझ्वलय् भिंतुना न्वचु तयादिसें बागमती प्रदेशया सामाजिक विकास मन्त्री हरिप्रभा खड्गी श्रेष्ठं क्लबं न्ह्याकूगु न्वचुकला तालिमय् ब्वति कयाः थःम्हं न्वचु बी सयेकागु व थुकिं यानाः हे थःत राजनीतिक ख्यलय् अझ न्ह्याः वनेत तिबः जूवंगु खँ लुमंकादिल ।
भिंतुना न्वचुया हे झ्वलय् येँ महानगरपालिकाया उपप्रमुख सुनिता डंगाेलं क्यालिजात्रा न्ह्याकेगु झ्वलय् क्लबलिसे सहकार्य याये खंगु खँयात लुमंकादिसें क्लबं भाषा, संस्कृतिया निंतिं म्हितूगु भूमिका नं उतिकं हे च्वछायेबहःजूगु खँ कनादिल ।
ज्याझ्वलय् बागमति प्रदेशया सांसदपिं समिता खड्गी व सरिता शाही, येँ महानगरपालिकाया पूर्वमेयर विद्यासुन्दर शाक्य, ज्यापु महागुथि नेपाःया नायः सत्यनारायण डंगाेल, ज्यापु संस्कृति विकास काेषया नायः मंगलकृष्ण सिंह, येँ मनपा १२ वडाया दुजः पुष्परत्न प्रजापति, महिला बाैद्ध समूहया नायः श्रीमिला सुवाललिसेंयापिसं भिंतुना न्वचु तयादीगु खः ।
ज्याझ्वलय् संविधानसभाया सभासद् ध्यानगाेविन्द रंजित, ज्यापु महागुथि नेपाः येँ महानगर समितिया नायः पञ्चनारायण महर्जन, मिसा लिधंसा पुचःया नायः गंगादेवी डंगाेल, रेडियाे उपत्यका संचालक समितिया नायः पुष्प पराजुलीलिसें थीथी व्यक्तित्वपिनि विशेष उपस्थिति दुगु खः ।
क्लबया नायः प्रचण्डमान बज्राचार्यया सभापतित्वय् न्ह्याःगु ज्याझ्वलय् क्लबया संस्थापक दुजःपिनिलिसें स्व. चक्रमान डंगाेल, डा. हिरामन प्रधान व सि. नर्स लक्ष्मी मानन्धरयात विशेष सम्मान याःगु खःसा ज्यासना पुचःया दुजःपिन्त कदर पाै लःल्हाःगु खः ।
ज्याझ्वलय् क्लबया लुबुदिंया लसताय् पिथंगु स्मारिका नं पाहाँपिनिपाखें मंकाःकथं विमाेचन याःगु खः ।
क्लबया छ्याञ्जे प्रबिन महर्जनं न्ह्याकूगु ज्याझ्वलय् दुजःछ्याञ्जे सन्तकुमार महर्जनं लसकुस यानादिसें संक्षेपं नारायण परिवार क्लबया म्हसीका व मूमू ज्याया बारे जानकारी बियादीगु खः ।