राष्ट्रपति रामचन्द्र पौडेलं लिपांगु आन्दोलनया उपलब्धियात संस्थागत यायेगु महत्त्वपूर्ण आधार प्रदेश जूगु न्ह्यथनादिसें प्रदेशया सफलता हे सङ्घीय लोकतान्त्रिक गणतन्त्रया सफलता जूगु धयादीगु दु ।
थौं शीतल निवासय् राष्ट्रपति पौडेल व प्रदेश प्रमुखत नाप लायेगु झ्वलय् वय्कलं लोकतन्त्रयात सफल यायेत प्रदेश सफल जुइमाःगु धारणा तयादिल ।
“प्रदेशत सुदृढ जुल धाःसा थ्व व्यवस्था सुदृढ जुइ, संविधानया मुक्कं व प्रभावकारी कार्यान्वयनया नितिं आवश्यक जूगु सङ्घीय, प्रादेशिक व स्थानीय तहया कानुनया तर्जुमा व उकिया निष्कपट कार्यान्वयनं संविधानया औचित्य व सार्थकता प्रमाणित जुइ धइगु जिगु भलसा दु”, राष्ट्रपति पौडेलं धयादिल ।
प्रदेश प्रमुखत प्रदेशया प्रमुख नापनापं केन्द्रया प्रतिनिधि नं जूगुलिं सङ्घ व प्रदेश दथुइया समन्वयकर्ताकथं भूमिका म्हितेमाःगु कनादिसें वय्कलं प्रदेश प्रमुखत सङ्घीयताया ताँकथं जूगु धयादिल । “उकिं यानाः राष्ट्रपति व प्रदेश प्रमुखत दथुइ मद्दिक सम्पर्क, संवाद व समन्वय जुइमाःगु जरुरी खः”, वय्कलं धयादिल ।
राष्ट्रपति पौडेलं प्रादेशिक कानुन निर्माण प्रक्रिया पूवंकाः याकनं कार्यान्वयनय् यंकेगु कथं ज्या जुयाच्वंगु धयादिल । “ प्रादेशिक कानुन गुलि याकनं कार्यान्वयनय् वइ, उलि सहज जुइ । गुलि ह्यूपाःया लाभ फयांफक्व याकनं नागरिकतय् छेँय् थ्यंकेफइ उलि जनतायाके व्यवस्थाप्रतिया भलसा अप्वयावनी, थुकिइ लिमबाकुसे स्वापू दुपिं सकसिनं थःथःगु थासं तिबः बिइगु ज्या याये”, वय्कलं धयादिल ।
“प्रदेशया संरचनां जक राजनीतिक महत्त्व स्थापित जुइमखु, थुकिया चरित्रयात जनमुखी, समावेशी व सुशासित यायेगु जरुरी जू, चरित्रया ह्यूपाः वइगु मू विषय खः । राजनीतिक उपलब्धियात नागरिकतय् जीवनलिसे स्वाके, प्रदेश–प्रदेशदथुइ स्वस्थ धेंधेंबल्ला याये, नापनापं अन्तरप्रदेश सहकार्य व समन्वयय् बः बिइ, थवंथः सहकार्यं फुक्कसित लाभ जुइ धइगु जिं तायेकाच्वना”, राष्ट्रपति पौडेलं धयादिल ।
वय्कलं प्रदेशया आन्तरिक स्रोतयात फयांफक्व छ्यलाः प्रादेशिक विकासया न्हून्हूगु योजना दयेकेत, फुक्क प्रदेशं थःगु मौलिकता निर्माण यानाः न्ह्याःवनेत सम्बन्धित सरकारयात सुझाव बिइमाःगु आवश्यकता क्यनादिल ।
नागरिकतय् हनाबना, स्वाभिमान व समृद्धि जूगुलिं थुकिइ प्रदेश प्रमुखतय्सं फुक्क प्रदेशयात केन्द्रित यायेत तिबः बिइगु ज्या यायेमाःगु वय्कःया धापू खः । “जिं सुशासन, जनताय् प्रभावकारी सेवा प्रवाह व लोकतन्त्रया सुदृढीकरणय् केन्द्रित जुयाः बः बियाच्वना, जनस्तरय् लोकतन्त्रप्रति भलसा थनेत बौद्धिक वर्ग, नागरिक समाजया न्ह्यलुवातय्त सम्पर्क नापं सहलह यानाः सहकार्य व समन्वयपाखें लँपु पिकायेत कुतः यायेमाः”, राष्ट्रपति पौडेलं धयादिल ।
विकास निर्माण, सुशासन, कृषि, पर्यटन, शिक्षा, स्वास्थ्य, साहित्य, कला, संस्कृतिलिसें ख्यःया विकास, तब्याकेगुलिइ सुझाः बिइगु व थ्व ख्यलय् सम्पर्क नापं सम्बन्ध तब्याकेगु ज्याय् जुइत वय्कलं प्रदेश प्रमुखयात सुझाव बियादिल ।
राष्ट्रपति पौडेलं झीपिं फुक्क मिले जुयाः सङ्घीय लोकतान्त्रिक गणतन्त्रयात सुदृढ यायेगुपाखे न्ह्यायेनु धकाः इनाप यानादिल । उगु झ्वलय् न्हय्गू हे प्रदेशया प्रदेश प्रमुखतय्सं थःपिंसं फयेमाःगु समस्या, कानुन नियमय् दूगु अन्यौललिसें थी थी पक्षया बारे जानकारी बियादिसें थुकियात ज्यंकेत सम्बन्धित निकायतय् ध्यानाकर्षण याकेत राष्ट्रपतियात इनाप यानादिल ।