श्री हलचोक आकाशभैरवको १२ दँया जात्रा शनिवाः होल्चोय् समापन पुजा यासें क्वचायेकूगु दु । भैरवया यात्रा वा जात्राया झ्वलय् मिखा चूलाके मज्यूम्ह देवीकथं झिंनिदँय् लच्छि जक धर्तिइ कुहाँ बिज्याइम्ह आकाश मार्गं न्ह्याइम्ह द्यःकथं थुगु जात्रा न्ह्याकूगु खः ।
वैशाख १ गते हल्चोकया द्यःछेँ न्ह्यःने पञ्चबलिसहित पूजा यानाः न्ह्याःगु जात्राया न्हापांगु दिं राष्ट्रपति रामचन्द्र पौडेलं आकाश भैरवलिसें झिम्ह द्यःपिनि दर्शन यानादीगु खः । लच्छियंकया जात्राय् लखौं श्रद्धालुपिसं थुम्ह द्यःपिनि दर्शन याःगु खः ।
बैशाख २ गतेनिसें न्हिथं ताम्सिपाखां हनुमानढोकाय् हाजिर याये धुंकाः कालभैरव न्ह्यःने पञ्चबलिसहित पूजा याःगु खः । १२ दँया जात्राय् लच्छियंकं थीथी थासय् प्याखं न्ह्यब्वयेगु ज्या जूगु खः ।
यँयाःबलय् श्री आकाशभैरव, चण्डी र कुमारीया जक प्याखं न्ह्यब्वइगु थुम्ह द्यःया झिंनिदँया जात्राय् वय्कःपिनिलिसें गंगा, महादेव, पार्वती, आकाशदेवी, बाराही, महाकाली व दक्षिणकाली यानाः झिम्ह द्यःपिनि प्याखं न्ह्यब्वःगु खः ।
थुगुसी झिंनिदँया जात्राया झ्वलय् केलटोल, मरु, खुसिबुँ, हनुमानढोका, असन डबली, दमाई टोल, वतु, चिकंअत, न्यतपाःच्व, हिको त्वाः, ब्रह्मटोल, ताम्सिपाखा, बुरांख्यः, बहति (सोह्रखुट्टे), मखन, न्हयोखा, झोछें, जैसीदेवल, ढल्को, ताम्सिपाखा, डल्लु, डल्लु चौतारा, सिद्धार्थ चोकमा श्री आकाशभैरव प्याखं न्ह्यब्वःगु खः । भक्तजनपिसं श्री आकाशभैरव द्यःगणलिसें बाजंखलः व मुस्याःयात यानाः २५ ब्व छानाः दर्शन याःगु खः । जात्राया झ्वलय् लिपांगु दिं हलचोकय् च्वंगु द्यःछें आकाशभैरव व मेपिं द्यःपिन्त हलचोकय् चाःहिकूगु खःसा अनंलिपा पञ्चबलि बियाः जात्रा क्वचायेकूगु खः । हलचोक आकाशभैरव समाजया नायः शेरबहादुर पुतवारं लच्छितक न्ह्याःगु जात्राया झ्वलय् स्वक्वः अनिवार्य पञ्चबलि बीमाःगु खँ कनादिल । थ्व बाहेक श्रद्धालुपिसं थःपिनि श्रद्धाकथं नं पञ्चबलि पुजा ग्वसाः ग्वय् फुगु वय्कलं कनादिल । थुगु जात्राया निंतिं मासंगाःया तेजबहादुर चित्रकारं ख्वाःपाः च्वज्या यानादीगु खः । जात्रा ज्वःछि प्रहरी वृत्त जनसेवा, ट्राफिक प्रहरी वृत्त जनसेवा, महानगरीय प्रहरी बलपिसं सुरक्षाया व्यवस्था यानाब्यूगु खः । जात्राया झ्वलय् न्हापांगु दिं हल्चोकय् शार्दुल जङ्ग गुल्म (गुर्जुया पल्टनं) लिसें नेपाल आर्मीया ब्याण्डया नं ब्वति दुगु खः ।
