संसार नेशनल स्टार म्युजिक भिडियो अवार्ड ११४५ वंगु शनिवाः नेपाल प्रज्ञा प्रष्ठिानय् क्व चाल । वल्र्ड रेकर्ड तयेगु कथं ग्वसाः ग्वःगु ज्याझ्वलय् बागमती प्रदेशया श्रम, यातायात लिसे रोजगार मन्त्री प्रेम महर्जन मूपाहां कथं झायादीगु खः ।
ज्याझ्वलय् च्वमि, निर्देशक व साहित्यकार प्रकाश सायमि, नेपाःया फिल्म ख्यःया कलाकारपिं रविन्द्र खड्का, धिरेन शाक्य, सिमान्त उदास, गायिका देविका बन्दना, गीतकारपिं भुषण खरेल, बुद्ध बीर लामा, साहित्यकार बिक्रम भक्त जोशी, नृत्य निर्देशक भुवनदास श्रेष्ठ लगायत विशेष पाहां कथं झायादीगु खः । नेपालभाषा स्टार म्युजिक भिडियो अवार्डय् ३१ विधाय् सच्छि व न्हय्निम्ह सर्जकपिंत अवार्ड लःल्हाःगु खः ।
थ्व अवार्ड हलिमया दकलय् ताःहाकःगु व अप्वः अवार्ड बिउगु कथं विश्व रेकर्ड गिनिज बुकय् दुथ्याकेगु तयारी जुयाच्वंगु दु । ज्याझ्वलय् नेपालभाषाया म्ये संगीत क्षेत्रय् जीवन पानाः क्रियाशील जुयादीम्ह गायक व संगीतकार रत्न बेहासी वज्राचार्ययात नगद २५ हजार तका लिसे लाइफटाइम अचिभमेन्ट अवार्ड देछाःगु खः ।
अथे हे नेपाली व नेपालभाषाया न्ह्यलुवा कलाकार पवन जोशीयात १५ तका दां लिसें मल्टिमिडिया स्टार अवार्ड देछाःगु खःसा नेपालभाषा म्युजिक भिडियोया न्हापांम्ह निर्देशक विजयरत्न तुलाधर असंबरेयात सम्मान कथं अवार्ड देछाःगु खः ।
यल महानगरपालिका वडा नम्बर १६ या वडा अध्यक्ष निर्मल रत्न शाक्ययात सर्वोत्कृष्ट गीतकार अवार्ड व येँ महानगरपालिका वडा नम्बर १८ या वडाध्यक्ष न्हुच्छेकाजी महर्जनयात गीतकार विधाय् जुरी अवार्ड बिउगु खःसा बागमती सफाई अभियानया अभियन्ता गीतकार बागमती भाई सुन्दरमान श्रेष्ठयात गीतकार विधाय् पिपल्स च्वाइस अवार्ड बिउगु खः ।
थीथी ३१ विधाय् प्रतिस्पर्धात्मक कथं अवार्ड बिउगु ज्याझ्वलय् न्ह्यलुवाः कलाकःमिपिं आशाकाजी थकू, कृष्णभक्त महर्जन, संगीता शाक्य, जुगल डंगोल, रामकृष्ण खड्गीयात संसार तेज बहादुर स्मृति अवार्ड देछाःगु खःसा सरस्वती मानन्धर, बुद्ध साय्मि, रवि साय्मि, अनिल तुलाधर, सुरेन्द्र मानन्धर, निशा देशार व विश्वास वज्राचार्ययात संसार सप्तरंगी सम्मान देछागु खः ।
अथे हे ज्याझ्वलय् विशेष योगदान सम्मान कथं सोहन मानन्धर, किशोर कुमार शाही, विजय मास्की मगः, सबिना मानन्धर व रुक्साना महर्जनयात हंगु खःसा सामाजिक अभियन्ता राजाराम तण्डुकारयात संसार फेसबुक प्रोफाइल अवार्ड देछाःगु खः । विराजकाजी राजोपाध्याय व प्रमिला साय्मिं न्ह्याकूगु ज्याझ्वलय् यल वडा नम्बर २१ या वडा अध्यक्ष रबिन्द्र महर्जनं लसकुस यानादीगु खः ।
नेपालभाषा स्टार म्युजिक भिडियो अवार्डय् ३१ विधाय् सच्छि व न्हय्निम्ह सर्जकपिंत अवार्ड
ByNhaykan
May 19, 2025