झीगु कला संस्कृतिया संरक्षण झीसं हे यायेमाः धइगु तातुनाः स्वनातःगु नेवाः सांस्कृतिक पुचःया ग्वसालय् जूगु लछियंकया मादल प्रशिक्षण ज्याझ्वः म्हिगः छगू ज्याझ्वःयासें क्वचायेकूगु दु ।
येँ महानगरपालिका १२ व १८ वडाया अध्यक्षपिं बालकृष्ण महर्जन व न्हुछेकाजी महर्जनया मूपाहाँसुइ जूगु ज्याझ्वलय् ज्यापु संस्कृति विकास काेषया न्वकु सन्तकुमार महर्जन, हलिं नेवाः दबू नेपाः च्याप्टरया नायः सुरेन्द्रभक्त श्रेष्ठ पाहाँकथं झायादीगु खः ।
ज्याझ्वलय् नुगःखँ तयादिसें मूपाहाँ येँ मनपा १२ वडाया नायः बालकृष्ण महर्जनं मादल प्रशिक्षणय् ब्वति कयादीपिन्त भिंतुना देछानादिसें झीगु संस्कृति परम्परायात व्यवसायिक ढंगं न्ह्याका यंकेमाःगु व संस्कृति संरक्षणया निंतिं वडापाखें माःकथं ग्वाहालि यायेत तयार दुगु खँ तयादिल ।
थुकथं हे मेम्ह मूपाहाँ येँ मनपा १८ वडाया नायः न्हुछेकाजी महर्जनं प्रशिक्षार्थीपिन्त भिंतुना देछासें थःपिसं सयेकागु ज्ञानयात छ्यलाः अझ अप्वः न्ह्यज्याः वनेमा धइगु भिंतुना देछानादिल । वय्कलं सांस्कृतिक ख्यलय् थाैंकन्हय् वयाच्वंगु सांस्कृतिक विचलनयात कुंखिनादिसें वय्कलं बाजं थाइपिं नं अनुशासित जुइमाःगु खँय् बः बियादिल । वय्कलं जात्रा बलय् धिमे बाजं थानाः ब्वति काइपिसं हःगु विकृतिं समाजय् नकारात्मक सन्देश वनीगु जूगुलिं जात्रायात बांलाकेगु निंतिं बाजं थाइपिसं थ्व याये ज्यू व थ्व याये मज्यू धइगु खँयात गुरूपिं व सम्बन्धित खलःया जिम्मेवार मनूतय्सं थुइका बी माःगु खँ तयादिल ।
नरेश प्रजापतिया मूप्रशिक्षणय् न्ह्याःगु स्यनेज्याय् शेष नारायण महर्जनं ग्वाहालि यानादीगु खःसा सहायक प्रशिक्षक कथं अद्वितीय महर्जनं स्यनेज्या याःगु खः । स्यनेज्याय् ५ दँनिसें ५९ दँतकया २५ म्हेसिया ब्वति दुगु खः ।
पुचःया नायः सुनिता महर्जनया सभानायःसुइ न्ह्याःगु ज्याझ्वलय् पुचःया संरक्षकद्वय देय् बाजं गुरू शेषनारायण महर्जन व सूर्यनारायण महर्जनया विशेष उपस्थिति दुगु खःसा ज्याझ्वःया कजिलिसें पुचःया छ्याञ्जे नविन सिंहं लसकुस यानादीगु खः ।
ज्याझ्वः सृजना सिंहं न्ह्याकादीगु खःसा नेवाः सूचना केन्द्र व मेराे साप्ताहिकपाखें फेशबूक लाइभ याःगु खः ।