नेपालभाषा एकेडेमिया ग्वसालय् शनिबार येँया सभागृहय् नेवाः प्रविधि व शिल्प ज्ञान न्हापांगु राष्ट्रिय सम्मेलन गोष्ठी जुल । उगु गोष्ठी ज्याझ्वःया उलेज्या उपप्रधान तथा शहरी विकास मन्त्री प्रकाशमान सिंहं यानादीगु दु ।
ज्याझ्वलय् उपप्रधान तथा शहरी विकास मन्त्री सिंहं थुगु गोष्ठीं नेवाःतय्सं छ्यलावयाच्वंगु प्रविधिइ न्हापा व थौंकन्हय् गुलि ह्यूपाः वल धइगु सीकेत नं ग्वाहालि जुइ धयादिसें थुगु गोष्ठीं पिहाँवःगु लिच्वः सकसिनं सिइक प्रचार यायेमाःगुलिइ बः बियादिल ।
नेपालभाषा एकेडेमिया चान्सलर भाजु मल्ल के सुन्दरया सभानायःसुइ जूगु ज्याझ्वलय् येँ महानगरपालिकाया उपमयेर सुनिता डंगोल लगायत आदिबासी जनजाति उत्थान राष्ट्रिय प्रतिष्ठानया राम कुमार मादेन , येँ महानगरपालिका सम्पदाया कजि आशामान संगत, येँ महानगरपालिकाया सम्पदा विभाग प्रमुख कुमारी राई, साल्ट ट्रेडिङ कर्पोरेशनया महाप्रबन्धक उर्मिला श्रेष्ठलिसेंया उपस्थिति दूगु खः ।
साल्ट टेडिङ कर्पोरेशनया ग्वाहालिं व येँ महानगरपालिका व आदिबासी जनजाति उत्थान राष्ट्रिय प्रतिष्ठानया सहकार्यय् जूगु थुगु गोष्ठीइ विज्ञपिं मध्ये बुद्ध रत्न डंगोलं बुँज्या, सिर्जना प्रजापतिं सिँज्या व पद्म सुन्दर जोशीं शहरी विकासया बारे ज्यापौत न्ह्यब्वःगु खःसा उकि बृहत छलफल याना लिच्वः पिकागु खः ।