गायन ख्यलय् नकतिनि जक पला न्ह्याकादीम्ह न्हूम्ह म्येहालामि पुरुषोत्तम श्रेष्ठया नेपालभाषाया म्ये ‘सुथसिया निभाः जुयाः सोमबार’ सार्वजनिक जूगु दु ।
नेपाःया न्हापांगु संकिपा ‘आमा’या आमा चैत्यदेवी सिंहं उगु म्यूजिक भिडियो सार्वजनिक यानादीगु खः । कन्फ्राक्टिभ मिडिया सोलुसन प्रा लिया ग्वसालय् उगु ज्याझ्वलय् नांजाम्ह संगीतकःमि गायक जुजुकाजि रन्जित, नृत्य निर्देशक भुवन दास श्रेष्ठ, संगीत निर्देशक बुद्ध सायमि व नेपालभाषाया न्हापाम्ह म्युजिक भिडियो निर्देशक विजयरत्न असंबरें उगु भिडियो या समीक्षात्मक टिप्पणी यानादिल । ज्याझ्वः बिराजकाजी राजोपाध्यायया सभानायसुइ जूगु खः ।
थःगु म्ये सार्वजनिक जुउबलय् थः तसकं उत्साहित दुगु श्रेष्ठं धयादिल । ‘बांलाःगु म्ये दयेकेत जिपिं दक्वसिनं मिहिनेत यानागु दु । स्वकुमि, न्यनामिं मतिना, साथ बियादी धइगु विश्वास दु’ श्रेष्ठं धयादिल । ज्याझ्वः धुंकाः थःगु हे युट्युब च्यानलमार्फत म्ये विश्वब्यापी सार्वजनिक जुइगु जानकारी नं श्रेष्ठं बियादिल ।
उगु म्यूजिक भिडियोया छायाङ्कन व दृश्य सम्पादन पूर्ण महर्जनं यानादीगु दु । निर्देशन बिराजकाजी राजोपाध्यायं यानादीगु दुसा थ्व म्येया रचनाकार नं बिराजकाजी हे खः । थम्हं करीब झिन्या दँ लिपा म्यूजिक भिडियो निर्देशन ख्यलय् पुनरागमन यानागु राजोपाध्यायं धयादिल । ‘न्हापा नेपाल टेलिभिजनय् हसना ज्याझ्वः न्ह्याकाबलय् छुं म्यूजिक भिडियोत निर्देशन यानागु खः । आः तःदँ लिपा छपु बांलाःगु म्येया म्यूजिक भिडियो निर्देशक यायेखंगु दु, जि तसकं लयताः’ निर्देशक राजोपाध्यायया धापू खः ।
म्येया छायाङ्कन दहचोक, मातातीर्थ व येँया खुसिबुँ लागाय् यानातःगु दु । म्यूजिक भिडियोलय् म्येहालामि श्रेष्ठलिसें वयकःया हे तिरि मयजु रन्जु श्रेष्ठं अभिनय यानादीगु दु । निर्देशक राजोपाध्यायं च्वयादीगु म्येग्वःयात सुमन कपालीं लसय् हनेगुलिसें संगीत संयोजन नं यानादीगु दु ।