नेपाल आदिवासीजनजाति पत्रकार महासंघ (फोनिज)या स्वक्वःगु तःमुँज्या रामेछापया मन्थलीइ च्वंगु तीनलाल पार्कय् न्ह्यात ।
ऊर्जा, जलस्रोत तथा सिंचाइ राज्यमन्त्री पूर्णबहादुर (कान्छाराम) तामाङया मूपाहाँसुइ जूगु उलेज्याझ्वलय् फोनिजया संघीय नायः गजुरधन राई, उद्योग पर्यटन वन तथा वातावरण समितिया सभापति आनन्द कुमार श्रेष्ठ, बागमती प्रदेश सभा सदस्य तारानारायण श्रेष्ठ विशेष पाहाँकथं झायादीगु खः ।
तामाङभाषं द्यः पुकारे यानाः न्ह्याकूगु ज्याझ्वलय् फोनिज बागमतीया थीथी गतिविधि कःघानातःगु लुमन्ति पौ (स्मारिका) नं पितब्वज्या जूगु खः ।
नेपाल पत्रकार महासंघया संस्थापक नायः सत्यनारायण बहादुर श्रेष्ठयात नं लुमंकूगु ज्याझ्वलय् मिसा पत्रकार हना निसा तामाङ व फोनिज काभ्रेया नायः इन्द्र थाापामगरयात न्याद्वः तकालिसें हनेज्या याःगु खः । थुकथं हे फोनिज रामेछापया नायः कुमार श्रेष्ठयात नं हंगु खः ।
थुकथं हे नेपाल पत्रकार महासंघया थीथी पदय् निर्वाचित फोनिज बागमती प्रदेशया जःपिन्त नं ज्याझ्वलय् सम्मान याःगु खः ।
ज्याझ्वलय् नुगः खँ तयादिसें मूपाहाँ तामाङं न्हापा तामाङतय्त पिपा धकाः सिँक्वबीगु ज्याय् सिमित यानातःगु व प्रजातन्त्र स्थापनालिपा जक तामाङत राज्यशक्तिइ थ्यंगु खँ तयादिल ।
देसय् दलीय राजनीति अप्वःगु खँय् दुःख ताय्कुसें वय्कलं थम्हं पार्टीया खः मखु धकाः मस्वसे ज्या याइम्हेसित तिबः बियागु खँ तयादिल । नेपाल विद्युत प्राधिकरणया प्रमुख कुलमान घिसिङया ज्यायात सरकारं स्पष्टीकरण फ्वंगु इलय् थम्हं उकिया विरोध यासें कुलमानयात चीके मज्यूगु पक्षय् दनागु खँ कनादिल ।