प्रधानमन्त्री केपी शर्मा ओलीया न्ह्यःने थी थी स्वंगू विश्वविद्यालयया नवनियुक्त उपकुलपतितय्सं थौं पद व गोपनीयताया शपथ कयादीगु दु । प्रधानमन्त्री नापं मन्त्रिपरिषद्या ज्याकुथि, सिंहदरबारय् जूगु ज्याझ्वलय् कुलपतिया हैसियतं प्रधानमन्त्री ओलीं नेपाल संस्कृत विश्वविद्यालयया उपकुलपति प्रा डा धनेश्वर नेपाल, पोखरा विश्वविद्यालयया उपकुलपति प्रा डा वेदराज केसी व कृषि नापं वन विज्ञान विश्वविद्यालयया उपकुलपति प्रा डा शारदा थपलियाया शपथ कयादीगु खः । प्रधानमन्त्री ओलीं नवनियुक्त उपकुलपतितय्त कार्यकाल सफलताया निंतिं मनतुनादिल । उगु ज्याझ्वलय् सहकुलपति नापं शिक्षा, विज्ञान व प्रविधिमन्त्री विद्या भट्टराई, नेपाल सरकारया उच्चाधिकारीलिसें च्वनादीगु खः ।
By सुनिता महर्जन
वि.सं. २०६० सालय् मेट्राे एफएमय् सांस्कृतिक मण्डल ज्याझ्वः न्ह्याकाः औपचारिक रूपं सञ्चार ख्यलय् न्ह्यज्यानादीम्ह सुनिता महर्जनजु थ्वयां न्ह्यः नं सन्ध्याटाइम्स न्हिपतिइ इलय्ब्यलय् फिचर राइटिङ यानावयाच्वनादीम्ह खः । सांस्कृतिक मण्डल ज्याझ्वःया निंतिं समाचार संकलन, कार्यक्रम प्रस्ताेता व निर्माणया ज्या यानादीम्ह वय्कलं इलय्ब्यलय् अप्सरा वाःपाै, तिकिझ्याः वाःपाैलिसेंया नेपालभाषाया पत्रिकाय् च्वसु प्रकाशित यानादीगु दु । लिपांगु इलय् मेराे साप्ताहिक पत्रिकाय् प्रमुख संवाददाताकथं ज्या यानाच्वनादीगु दु । नेवाः संचार ख्यलय् मिसातय् उपस्थितियात सशक्त दय्के माः धइगु तातुनां वय्कःया हे पहलय् न्हाय्कं डटकम न्ह्याकादीगु दु । वय्कः थाैंकन्हय् नेवाः पत्रकार राष्ट्रिय दबूया केन्द्रीय ल्यूछ्याञ्जे जुयादी सा आदिवासी जनजाति पत्रकार महासंघ (फोनिज)या नं केन्द्रीय दुजः जुयादी ।