चीनया औपचारिक भ्रमण यानाच्वनादीम्ह प्रधानमन्त्री केपी शर्मा ओलीयात चिनियाँ समकक्षी ली छ्याङं ग्रेट हल अफ पिपलय् थौं लसकुस यानादीगु दु ।
प्रधानमन्त्री ओलीयात हनाबनाकथं चिनियाँ जनमुक्ति सेनां ‘गार्ड अफ अनर’ न्ह्यब्वःगु खः । समारोहस मेमेपिं चिनियाँ नेतातय्सं नं ब्वति कयादीगु खः । उगु झ्वलय् प्रधानमन्त्री ओलीं समकक्षी छ्याङयात थःगु भ्रमण दलया दुजतय्गु म्हसीका बियादिल । चिनियाँ प्रधानमन्त्रीं नं थःपिनि मेमेपिं नेतातय्गु म्हसीका बियादिल ।
थ्वयांलिपा निगू देय्या प्रधानमन्त्रीस्तरया निगूलिंपक्ष दथुइ नाप लायेगु व ल्हाःचिं ज्याझ्वः जुइ । प्रधानमन्त्री ओलीं थौं हे चीनया राष्ट्रपति सी जिनपिङयात नाप लानादिइ ।
प्रधानमन्त्री ओली नेतृत्वया प्रतिनिधिमण्डल थ्व हे मङ्सिर १७ गते जनवादी गणतन्त्र चीनया औपचारिक भ्रमणया निंतिं बेइजिङ झायादीगु खः । भ्रमण दलय् न्हापांम्ह मिसा राधिका शाक्य परराष्ट्रमन्त्री डा आरजु राणा देउवा, प्रधानमन्त्रीया मुख्य सल्लाहकार विष्णुप्रसाद रिमाल, प्रधानमन्त्रीया आर्थिक नापं विकास सल्लाहकार डा युवराज खतिवडा, सङ्घीय सांसद, मुख्यसचिवलिसें विशिष्ट श्रेणीया सरकारी अधिकारी, निजी ख्यःया प्रतिनिधि, सञ्चारकःमिलिसेंया मनूत दुथ्याः ।