जावलाखेलय् च्वंगु लभ्ली होम प्रिस्कुलया ग्वसालय् वृहत बाल दिवस मेला थ्वहे भाद्र २९ गते शनिवाः जुइत्यंगु दु । राष्ट्रिय बाल दिवसया लसताय् लभ्ली होम प्रिस्कुलं थुगु उत्सव याय्त्यनागु खँ म्हिगः यलय् छगु प्रेस मिट यानाः जानकारी विउगु दु । थुगु मेलाय् विविध सांस्कृतिक ज्याझ्वः व विद्यार्थीपिनिगु लागि कासा नाप नापं नेवाः परिकारया स्टल नं दइगु जानकारी वःगु दु ।
लभ्ली होम स्कुलया संस्थापक माहेश्वरी अमात्यं मस्तयगु बाल्यकालयात अभिभावकपिनि नाप स्वानाः विविध कासा , सांस्कृतिक व थिथि गतिविधिनापं वृहत मेलाया ग्वसा ग्वयागु खः धैदिगु दु । ‘झीसं मस्तयगु बाल्यकालयात छगु उत्सवया रुप बिइगु चाहना खः । मस्तयगु बालापननाप स्वाना अभिभावकतय्त थःगु बाल्यकालया अनुभूति विइगु थुगु बाल दिवसया छगु लक्ष्य खः धयादिसें मेगु दिवस वा अवसरया उत्सवया रुपय् मानेयाइ थें बाल दिवसयात खासै महत्व विइमखुगु परिस्थितिइ मस्तय्गु दिवसयात उत्सवया रूपय् छाय् मानेमयाय्गु धकाः अमात्य न्ह्यसं तयादिल ।
उत्सवया मेगु मनोरन्जनात्मक प्रस्तुति धासा सिकाइ व पुस्तान्तरणया माध्यमं विद्यार्थीपाखें लाखेय्, पुलुकिसि, पपेट नं न्ह्यब्वयगु जानकारी लभ्ली होमया डान्स कोअर्डिनेटर सुजन बज्राचार्य जानकारी बियादिल । अथेहे पत्रकार सम्मेलनय् यल लाय्कू मिप्वाः लाखय् पुचःया संरक्षक उत्तम रत्न शाक्यं नं लाखेय् लगायतया स्थानीय संस्कृतिनाप स्वागु अमूर्त सम्पदायात रेस्टुरेन्ट, बार लगायतथासय् यंका दुरुपयोग याय् मजिउगु तर थुकिया मूल्य मान्यतायात कायम यानाः विद्यार्थीमार्फत पुस्तान्तरण जुइगु बांलाःगु पक्ष खः धयादिल । ‘विद्यार्थीपिन्सं लाखय् प्याखं ल्हुइगु स्वयाः लाखय्बारे शिक्षा काइ । दुरुपयोग जक जुइमजिउ , थथे भविष्यया कर्णधारपिन्त स्यनेगु बालागु पक्ष खः शाक्यं धयादिल । अथे थिथि सांस्कृतिक गतिविधिया नाप नापं ज्याझ्वःया मु आकर्षणया रुपय् निशा देसार व रोजमान महर्जनया प्रस्तुति जुइगु नं जानकारी पत्रकार सम्मेलनय् बिउगु खः । बाल दिवस मेला सुथय् ११ बजेनिसें न्हिनसिया ४ बजे तक जावलाख्यलय् जुइगु जानकारी ब्यूगु खः ।