थुगुसिया यँयाःया निंतिं ‘यःसिं’ भाद्र २६ गते (यंलाथ्व अष्टमि) खुन्हु हनुमानढोकाय् थ्यंकूगु दु । थ्वयांन्ह्यः ख्वपया सूर्यविनायक नगरपालिका वडा नं. १० या चित्तपोलया सामुदायिक गुं यःसिं भोटाहिटी हःगु खः । नेपाल पञ्चांग निर्णायक समितिं ब्यूगु साइतकथं वंगु यंलाथ्व दुतिया खुन्हु शुभ साइतय् गुरुजु पल्टनलिसें केन्द्रीय मानन्धर संघया पदाधिकारी यःसिं कायेत बसन्तपुरं वंगु खः ।
यःसिंया निंतिं सिमा पाले न्ह्यः बलिसहित विधिवत पुजा याःगु खः ।
समितिं ब्यूगु साइतकथं यंलाथ्व अष्टमी खुन्हु सुथय् १०ः३२ य् यःसिं देसय् दुत हःगु खः ।
हनुमान ढोकाय् हःगु यःसिं यंलाथ्व द्वादशी (२०८१।५।३०) खुन्हु थने धुंकाः यँयाः नखः न्ह्याःगुकथं काइ । यःसिं थने न्ह्यः यंलाथ्व एकादशी खुन्हु सनिलय् चस्वाद्वँ मानन्धर गुथिपाखें यःसिं थनेत माःगु खिपः यःसिंइ परम्परागत कथं चीगु याइ । थुगुसि यँलाथ्व द्वादशि, आइतबार सुथसिया ८ः२६ बजे यःसिं थनेगु साइट दु ।
