नेवाः पत्रकार राष्ट्रिय दबूपाखें राष्ट्रपति व सूचना तथा सञ्चारप्रविधि मन्त्री नापलात

नेवाः पत्रकार राष्ट्रिय दबूपाखें थौं राष्ट्रपति रामचन्द्र पौडेल व सूचना तथा सञ्चारप्रविधि मन्त्री पृथ्वी सुब्बा गुरुङ्गलिसे ब्यागलं ब्यागलं नाप लाःगु दु ।
दबूया नायः नृपेन्द्रलाल श्रेष्ठया नेतृत्वय् राष्ट्रपति कार्यालय शितल निवासय् नाप लायेगु झ्वलय् राष्ट्रपति पौडेलं नेपाल बहुजातीय, बहुभाषिक, बहुसांस्कृतिक देय् जूगु खँ संविधानय् हे च्वया तये धुंकूगु व थुकियात लागु याकेगु सरकारया हे जिम्मेवारी जूगु खँ कनादिल ।
वय्कलं नेपाली भाय्या आदिकवि भानुभक्त बूगु थाय् चुम्दीरम्घाय् भानु उद्यान दयेके त्यनागु व अन नेपाःया भाषिक विविधताया प्रतिनिधित्व जुइकथं थीथी भाय् च्वन्ह्याकेत योगदान बियादीपिं साहित्यिक व्यक्तित्वपिनिगु शालिक तयाः उगु थाय्यात साहित्यिक तीर्थस्थलकथं विकास याय्गु योजना दुगु व थुकिया निंतिं नेवाःतय्पाखें नं ग्वाहालि यायेत इनाप यानादिल ।
नेपालय् मांभाय्कथं न्ववाइगु नेपालभाषाया पत्रकारिता न्ह्याःगु सच्छिदँ थ्यंगु लसताय् दच्छियंकं दबूया ग्वसालय् न्ह्याके त्यंगु थीथी ज्याझ्वःया बारे न्यने धुंकाः सम्माननीय राष्ट्रपतिं ज्याझ्वःया सफलताया कामना यासें माःगु थासय् थःगु थासं नं सरकारया ध्यानाकर्षण याकेगु धयादिल । वय्कलं नेपाःया भाषिक विविधता ल्यंकेगु निंतिं नेवाः समुदाय र मैथिली समुदायं बियावयाच्वंगु योगदान च्वछायेबहःजू धयादिसें नेपालभाषायात जीवन्त दयेकेत योगदान बियादीपिन्त सुभाय् देछानादिल ।
राष्ट्रपतियात नाप लाये न्ह्यः सूचना तथा सञ्चार प्रविधि मन्त्री पृथ्वी सुब्बा गुरुङ्गयात वय्कःया मन्त्री निवासय् नाप लाःगु इलय् नेपाल आदिवासी जनजाति पत्रकार महासंघ (फोनिज)या प्रतिनिधिपिनिगु नं ब्वति दुगु खः ।
उगु झ्वलय् मन्त्री गुरुङ्गं नेपाल सरकार बहुभाषिक सञ्चार नीतिइ प्रतिबद्ध दुगु व नेपालय् न्ववाइगु मध्ये मुख्य भाय्यात सरकारी सञ्चार माध्यमय् थाय् बीमाःगु पक्षय् थः नं दुगु खँ कनादिल । वय्कलं नेपाल टेलिभिजनय् याकनं हे नेवाः भासं नं समाचार प्रशारण याकेगु निंतिं नं थःपिसं ज्या न्ह्याकेगु खँ कनादिल । वय्कलं याकनं हे सञ्चारलिसे सम्बन्धित ऐनकानूनयात नं पूर्णता बीत थःपिंसं ज्या यायेगु खँ कनादिल ।
नेपाःया न्हापांम्ह मातृभाषी पत्रकार धर्मादित्य धर्माचार्यया शताब्दी दँया लसताय् याइगु ज्याझ्वःया निंतिं थःपिनिपाखें फुचाःकथं ग्वाहालि यायेगु कनादिल ।
दबूया वरिष्ठ न्वकू सुनिल महर्जनया कजिसुइ थ्यंगु प्रतिनिधिमण्डलं वंगु जेठ १९ व २० गते येँय् जूगु अन्तर्राष्ट्रिय मातृभाषा पत्रकारिता सम्मेलनया घोषणा पौ नं लःल्हाःगु खः ।