येँ महानगरपालिका २४ वडाया ग्वसालय् नेपाल बुद्धिचाल महासंघ लिसे जाना न्हापांगु नविन्द्र स्मृति फिडे रापिड बुद्धिचाल प्रतियोगिता २०८१ न्ह्यात ।
थौं व कन्हे निन्हु यंक न्ह्याइगु धेँ धेँ बल्लाखय् नेपाःया ४० जिल्लां ११८ म्हेसिया ब्वति दु ।
नेपाःया बुद्धिचाल कासाया भिष्म पितामह कथं म्हसिउम्ह सिताराम अग्रवालया मुँपाहासुइ जुगु ज्याझ्वः ९ गु चरणय् न्ह्याइगु व त्याकामिपिन्त नगद लिसें ट्रफि व दसिपौ लल्हाइगु ग्वसा खलया नायः विनोद कुमार राजभण्डारीं कनादिगु दु ।
वय्कलं कनादि कथं येँ महानगरपालिकाया संस्थापक उपमेयर नविन्द्र राज जोशिया लुमन्तिइ थुगु ज्याझ्वः न्ह्याकुगु खः । धेँ धेँ बल्लाखय् ६ दँ निसें ८२ दँ तकयापिनिगु ब्वति दु ।
ज्याझ्वलय् येँ मनपा २४ वडाया दुजःपिं कृष्णमान सिंह, रत्नाकर बज्राचार्य, मिसा दुजः सुनिता महर्जनया लिसें वडा सचिव रविन्द्र बज्राचार्य पाहाँकथं ब्वति कयादीगु खः ।
